អ្នកទោសប៉ាឡេស្ទីនចំនួន 66នាក់ ដែលត្រូវបានដោះលែងពីមន្ទីរឃុំឃាំងរបស់អ៊ីស្រាអែលបានទៅដល់ទីក្រុង Ramallahហើយ កាលពីថ្ងៃព្រហស្បតិ៍ម្សិលម៉ិញនេះ ដែលជាផ្នែកមួយនៃក្រុមទីបីនៃការដោះដូរអ្នកទោសរវាងក្រុមហាម៉ាស និងអ៊ីស្រាអែលដែលត្រូវបានរួមបញ្ចូលនៅក្នុងកិច្ចព្រមព្រៀងបទឈប់បាញ់នៅក្នុងតំបន់ហ្គាហ្សាស្ទ្រីប។

ឡានក្រុងចំនួនពីរគ្រឿងដែលដំណើរការដោយកាកបាទក្រហមបានដឹកអ្នកទោសពីពន្ធនាគារយោធា Ofer របស់អ៊ីស្រាអែលនៅជិតទីក្រុង Ramallah ទៅកាន់កន្លែងទទួលភ្ញៀវមួយនៅកណ្តាលទីក្រុង។នេះបើយោងតាមអ្នកឆ្លើយឆ្លងព័ត៌មាន Anadolu ។

មុនពេលដោះលែង កងទ័ពអ៊ីស្រាអែលបានវាយឆ្មក់ទីក្រុង Beitunia ដោយដាក់ពង្រាយរថយន្តយោធា និងគ្រឿងចក្រឈូសឆាយ។ ទាហានបានបាញ់គ្រាប់ពិត និងគ្រាប់កៅស៊ូ ព្រមទាំងឧស្ម័នបង្ហូរទឹកភ្នែក ទៅកាន់ប្រជាជនប៉ាឡេស្ទីនដែលកំពុងរង់ចាំការមកដល់របស់ពួកគេ។

អឌ្ឍចន្ទក្រហមប៉ាឡេស្ទីនបានរាយការណ៍ថា បានរងរបួសចំនួន 14 នាក់ក្នុងនោះមានមនុស្ស 3 នាក់បានរងរបួសដោយសារគ្រាប់រំសេវ។

អ្នកជាប់ឃុំជាច្រើននាក់ដែលត្រូវបានដោះលែងមានសុខភាពមិនល្អ ដែលជាលទ្ធផលនៃអ្វីដែលអង្គការប៉ាឡេស្ទីនបានរាយការណ៍ថា ជាការធ្វើបាបជាប្រព័ន្ធ ការធ្វើទារុណកម្ម និងការអត់ឃ្លាននៅក្នុងពន្ធនាគារអ៊ីស្រាអែល។

ការដោះដូរចុងក្រោយនេះពាក់ព័ន្ធនឹងអ្នកទោសប៉ាឡេស្ទីន 110 នាក់ រួមទាំងអ្នកទោស 32 នាក់ ដែលជាប់ទោសអស់មួយជីវិត អនីតិជន 30 នាក់ និង 48 នាក់ដែលមានទោសខុសៗគ្នា។

ជាថ្នូរនឹងបក្ខពួកប៉ាឡេស្ទីននៅហ្គាហ្សាមុននេះ បានដោះលែងចំណាប់ខ្មាំងជនជាតិអ៊ីស្រាអែលបីនាក់ក្នុងនោះរួមមាន៖ អាហ្គាម ប៊ឺហ្គឺ, អាប៊ែល យ៉េហ៊ូដ និងហ្គាឌី ម៉ូសេ។

ការដោះដូរលើកទី២ បានធ្វើឡើងកាលពីថ្ងៃសៅរ៍ចុងសប្តាហ៍កន្លងទៅនេះ ដោយរួមមានទាហានស្ត្រីអ៊ីស្រាអែល ៤នាក់ មកពីតំបន់ហ្គាហ្សា ខណៈអ៊ីស្រាអែលបានដោះលែងជនជាតិហ្ស៊កដានីម្នាក់ និងប៉ាឡេស្ទីន ១៩៩នាក់ ចេញពីពន្ធនាគាររបស់ខ្លួន។

ការផ្លាស់ប្តូរលើកដំបូងបានកើតឡើងនៅថ្ងៃទី 19 ខែមករា ដែលជាថ្ងៃដំបូងនៃកិច្ចព្រមព្រៀងឈប់បាញ់ នៅពេលដែលស្ត្រីស៊ីវិលអ៊ីស្រាអែល 3 នាក់ត្រូវបានដោះលែងជាថ្នូរនឹងអ្នកជាប់ឃុំប៉ាឡេស្ទីនចំនួន 90 នាក់ រួមទាំងស្ត្រី និងកុមារ ទាំងអស់មកពីតំបន់ West Bank  រួមទាំងទីក្រុង Jerusalemផងដែរ ។

ដំណាក់កាលទីមួយនៃកិច្ចព្រមព្រៀង ដែលចែកចេញជាបីដំណាក់កាល មានរយៈពេល 42 ថ្ងៃ ដោយទាមទារឱ្យមានការដោះលែងជាបណ្តើរៗ នូវជនជាតិអ៊ីស្រាអែលចំនួន 33 នាក់ ដែលជាអ្នកទោសនៅរស់ និងសាកសពអ្នកស្លាប់ ជាថ្នូរនឹងអ្នកជាប់ឃុំប៉ាឡេស្ទីន និងអារ៉ាប់ ចន្លោះពី 1,700 ទៅ 2,000នាក់។

ការវាយលុករបស់អ៊ីស្រាអែលលើតំបន់ហ្គាហ្សាបានធ្វើឱ្យមនុស្សជាង 11,000 នាក់បាត់ខ្លួន ជាមួយនឹងការបំផ្លិចបំផ្លាញយ៉ាងទូលំទូលាយ និងវិបត្តិមនុស្សធម៌ដែលបានឆក់យកជីវិតមនុស្សចាស់ និងកុមារជាច្រើន ដោយសារគ្រោះមហន្តរាយដ៏អាក្រក់បំផុតដែលមិនធ្លាប់មាន។

តុលាការឧក្រិដ្ឋកម្មអន្តរជាតិបានចេញដីកាចាប់ខ្លួនកាលពីខែវិច្ឆិកា ឆ្នាំមុន សម្រាប់នាយករដ្ឋមន្ត្រីអ៊ីស្រាអែល Benjamin Netanyahu និងអតីតរដ្ឋមន្ត្រីការពារជាតិរបស់គាត់ Yoav Gallant ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅតំបន់ហ្គាហ្សា៕

ប្រភព៖ A News

ប្រែសម្រួលដោយ៖ វាសនា