សហព័ន្ធកីឡាបាល់ទាត់កម្ពុជា ត្រៀមរៀបចំក្រុមជម្រើសជាតិពីឥឡូវ ដោយបង្កើតក្លិបស្នូលមួយសម្រាប់ត្រៀមស៊ីហ្គេម ឆ្នាំ២០២៣

(ភ្នំពេញ)៖ លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា FFC បានបង្ហើបពីផែនការត្រៀមរៀបចំក្រុមជម្រើសជាតិកម្ពុជាមួយតាមរយៈការបង្កើតក្លិបស្នូលមួយ សម្រាប់ត្រៀមចូលរួមលេងក្របខណ្ឌលីគកំពូលកម្ពុជា ពិសេសត្រៀមបង្ហាញខ្លួនលើទីលានក្នុងស៊ីហ្គេម លើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។

ការថ្លែងរបស់ប្រមុខបាល់ទាត់កម្ពុជាខាងលើ បានធ្វើឡើងក្នុងមហាសន្និបាតរបស់សហព័ន្ធកីឡាបាល់ទាត់កម្ពុជា លើកទី១៤ ឆ្នាំ២០២០ នៅសណ្ឋាគារហ្គាឌែន ស៊ីធីភ្នំពេញ ដែលមានការចូលរួមពីសមាជិកប្រតិបត្តិសហព័ន្ធ ក្លិប និងសមាគម មកពី ២៥រាជធានី-ខេត្ត។ លោកនាយឧត្តមសេនីយ៍ សៅ សុខា បានថ្លែងថា «សហព័ន្ធកីឡាបាល់ទាត់កម្ពុជា មានផែនការមួយ គឺការត្រៀមរៀបចំក្រុមជម្រើសជាតិកម្ពុជាពីឥឡូវទៅ សម្រាប់ត្រៀមលេងឆ្នាំ២០២៣ នោះគឺការបង្កើតក្លិបបាល់ទាត់មួយ ដែលជាក្លិបស្នូល។ ក៏ប៉ុន្ដែសួរថា តើបង្កើតក្លិបនេះ ត្រូវយកកីឡាករពីណាមក? កីឡាករ គឺអត់មានកីឡាករណា ក្រៅពីកីឡាករ ដែលលេងឲ្យក្លិប ដែលសមាជិករបស់សហព័ន្ធកីឡាបាល់ទាត់កម្ពុជានោះទេ»។

យ៉ាងណាមិញសហព័ន្ធ ក៏ត្រូវស្វែងរកការគាំទ្រពីបណ្ដាក្លិបជាសមាជិកផងដែរ តែបើមានការគាំទ្រពីមហាសន្និបាទ សហព័ន្ធនឹងចាប់ផ្ដើមបេសកកម្មនេះ ដើម្បីរៀបចំក្រុមជម្រើសជាតិខ្លាំងមួយ សម្រាប់ត្រៀមស៊ីហ្គេម ឆ្នាំ២០២៣ ។ លោកសង្កត់ធ្ងន់ថា «បើមានការគាំទ្រពីអង្គមហាសន្និបាតនេះ គឺយើងមានពេលវេលា ៦ខែ ដើម្បីរៀបចំ ហើយការចាប់ផ្ដើមនៅឆ្នាំ២០២១ និងឆ្នាំ២០២២ ក្រុមដែលត្រូវត្រៀមលេងឆ្នាំ២០២៣ នៅលើទីលានក្នុងការប្រកួតលីគ ជំនួសក្រុមដែលមកពីសាលាបាល់ទាត់ជាតិបាទី ដែលកំពុងលេងសព្វថ្ងៃ»។ គួរបញ្ជាក់ថា ការបង្ហើបផែនការថ្មីនេះ ស្របពេលលោក សៅ សុខា មើលឃើញពីភាពក្មេងខ្ចី នៃវិស័យកីឡាបាល់ទាត់កម្ពុជា និងមានបញ្ហាប្រឈមមួយ គឺបញ្ហាគុណភាពកីឡាករ ដែលជាក្ដីកង្វល់ក្នុងដំណើឆ្ពោះទៅប្រជែងមេដាយស៊ីហ្គេម ឆ្នាំ២០២៣៕

ភ្ជាប់ទំនាក់ទំនងជាមួយ Town News
  • ដូច្នឹងផង២