(បាងកក)៖ នៅថ្ងៃពុធនេះ ក្រុមអ្នកតវ៉ាប្រឆាំងរដ្ឋាភិបាលថៃបានធ្វើបាតុកម្មភ្លាមៗ នៅទីក្រុងបាងកកបន្ទាប់ពីមានការប៉ះទង្គិចគ្នាជាមួយមន្ត្រីប៉ូលីសកាលពីថ្ងៃអង្គារហើយសកម្មជនរបស់ពួកគេ ២១នាក់ត្រូវបានចាប់ខ្លួន ខណៈដែលក្រុមគាំទ្ររាជានិយមក៏គ្រោងនឹងប្រមូលផ្តុំនៅវិមានប្រជាធិបតេយ្យដើម្បីគាំទ្រព្រះមហាក្សត្រផងដែរ។នេះបើតាមការចេញផ្សាយដោយសារព័ត៌មាន Reuters នៅថ្ងៃពុធ ទី១៤ ខែតុលា ឆ្នាំ២០២០។

ក្រុមបាតុករនៅតែទាមទារឱ្យមានការសរសេរដ្ឋធម្មនុញ្ញថ្មី និងការដកលោកនាយករដ្ឋមន្រ្តីប្រាយុទ្ធ ចាន់អូចា អតីតមេដឹកនាំរដ្ឋាភិបាលយោធាចេញពីតំណែង។ ពួកគេក៏បានអំពាវនាវឱ្យទប់ស្កាត់អំណាចនៃរាជាធិបតេយ្យ ទោះបីជាក្រុមបាតុករបានប៉ះទង្គិចគ្នាជាមួយមន្ត្រីប៉ូលីសកាលពីថ្ងៃអង្គារហើយសកម្មជន ២១នាក់ត្រូវបានចាប់ខ្លួនក៏ដោយ។ ក្នុងចំណោមអ្នកដែលត្រូវបានឃាត់ខ្លួនក្នុងកំឡុងពេលនៃការតវ៉ាកាលពីថ្ងៃអង្គារមានលោកJatupat Boonpattararaksaជាអ្នកដឹកនាំការតវ៉ា និងលោក Chaiamorn Kaewwiboonpan ជាអ្នកចំរៀង។

ក្រុមបាតុកររាប់រយនាក់បានចាប់ផ្តើមប្រមូលផ្ដុំគ្នាចាប់ពីម៉ោង៨ព្រឹកនេះនៅវិមានប្រជាធិបតេយ្យនៅទីក្រុងបាងកកនៅថ្ងៃខួបនៃការបះបោរឆ្នាំ ១៩៧៣ ដែលបានធ្វើឱ្យរដ្ឋាភិបាលយោធាធ្លាក់ចុះ។ មេដឹកនាំតវ៉ានិងមេធាវីសិទ្ធិមនុស្ស លោក អាណុន ណាំបា បានប្រាប់ក្រុមអ្នកតវ៉ាថា“ យើងកំពុងធ្វើការតវ៉ាមុនពេល ពីព្រោះក្រុមអ្នកគាំទ្ររាជានិយម គ្រោងនឹងចាប់ផ្តើមជម្លោះជាមួយយើង, យើងនឹងធ្វើការតវ៉ានេះដោយសន្តិវិធី” ។

សូមជម្រាបជូនថា ក្រុមគាំទ្ររាជានិយមមានគម្រោងប្រមូលផ្ដុំគ្នានៅក្បែរបាតុកម្មប្រឆាំងនឹងរដ្ឋាភិបាលដោយបង្កើនការភ័យខ្លាចមានអំពើហឹង្សានៅតាមដងផ្លូវរវាងក្រុមអ្នកគាំទ្រនិងក្រុមប្រឆាំងនៃស្ថាបន័រាជានិយមនេះ ។ បច្ចុប្បន្នការធ្វើបាតុកម្មគាំទ្ររាជានិយមមានចំនួនតិចបើប្រៀបធៀបទៅនឹងមនុស្សរាប់ពាន់នាក់ដែលបានចូលរួមបាតុកម្មប្រឆាំងរដ្ឋាភិបាលដ៏ធំបំផុតនៅក្នុងខែកញ្ញាកន្លងទៅ៕