ភ្នំពេញ៖ បុរសម្នាក់បានស្លាប់ និងម្នាក់ទៀតបានរងរបួសធ្ងន់បញ្ជូនទៅសង្គ្រោះភ្លាមៗនៅមន្ទីរពេទ្យ បន្ទាប់ពីពួកគេជិះម៉ូតូបុកគ្នាត្រង់ផ្លូវបំបែកជាបួន។ហេតុការណ៍នេះបានកើតឡើងកាលពីវេលាម៉ោង១ និង៤០នាទី រំលងអធ្រាត្រឈានចូល ថ្ងៃទី១៣ ខែមេសា ឆ្នាំ២០២៦ ស្ថិតតាមបណ្ដោយផ្លូវ៦៣ កែងផ្លូវ២៤២ សង្កាត់ចតុមុខ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុគេបានឃើញម៉ូតូ HONDA CRF ពាក់ស្លាកលេខ ភ្នំពេញ ភ្នំពេញ 1MJ-1836 ធ្វើដំណើរតាមបណ្តោយផ្លូវផ្លូវ២៤២ ក្នុងទិសដៅពីកើតទៅលិចលុះមកដល់ចំណុចកើតហេតុជាផ្លូវបំបែកជាបួនក៏មានម៉ូតូ HONDA Beat ពាក់ស្លាកលេខ កំពង់ធំ 1S-6057 ធ្វើដំណើរតាមបណ្តោយផ្លូវ៦៣ ក៏ជ្រុលបុកគ្នាពេញទំហឹងបណ្តាលឲ្យភាគីម៉ូតូBeat ស្លាប់ចំណែកភាគីម្ខាងទៀតរងរបួសធ្ងន់។
ក្រោយពេលកើតហេតុសមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញបានចុះមកធ្វើការវាស់វែងយកម៉ូតូទាំងពីរគ្រឿងទៅរក្សាទុករង់ចាំការដោះស្រាយគ្នានៅពេលក្រោយ ។ ចំណែកឯសពជនរងគ្រោះសមត្ថកិច្ចធ្វើលិខិតប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕
ដោយ៖ វិសាល
