ភ្នំពេញ ៖ នៅថ្ងៃទី៥ ខែវិច្ឆិកា ឆ្នាំ២០២០ ស្អែកនេះ គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់ សុខភាព និងសុវត្ថិភាពសង្គម (គ.ប.ផ.ក.) នៃក្រសួងមហាផ្ទៃ នឹងត្រៀម ដុតកម្ទេចចោល នូវឱសថ និងផលិត ផលក្លែងក្លាយជាង៥០០តោន។
យោងតាមសេចក្តីប្រកាសព័ត៌មាន របស់គណៈកម្មាធិការជាតិប្រយុទ្ធប្រឆាំង ផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់ សុខភាព និងសុវត្ថិភាពសង្គម(គ.ប.ផ.ក.) បានឲ្យដឹងថា ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ នឹងអញ្ជើញជាអធិបតីភាពក្នុងពិធីកម្ទេចឱសថខុសច្បាប់ចំនួន៧.៧តោន និងផលិតផលក្លែងក្លាយទូទៅចំនួន៥៣៣តោន ដោយសរុបទាំងអស់គឺចំនួន៥៤០.៧តោន ដែលកងកម្លាំងសមត្ថកិច្ចចម្រុះនៃគណៈកម្មាធិការ បានបង្ក្រាប និងរឹបអូសបាននាពេលកន្លងមកនោះ។
សូមបញ្ជាក់ថា ឱសថ និងផលិតផលក្លែងក្លាយទាំងនេះ ត្រូវបានកងកម្លាំងចម្រុះនៃគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់ សុខភាព និងសុវត្ថិភាពសង្គម បង្ក្រាបបានជាបន្តបន្ទាប់ នាពេលកន្លងមក នៅតាមរាជធានីខេត្តនៃប្រទេសកម្ពុជា ខណៈឱសថ និងផលិតផលក្លែងក្លាយនេះនឹងធ្វើឲ្យប៉ះពាល់សុខភាពយ៉ាងខ្លាំងដល់បងប្អូនប្រជាពលរដ្ឋ ដែលជាអ្នកប្រើប្រាស់ និងបរិភោគនោះ៕
