អង់គ្លេសបានសន្យាកាលពីថ្ងៃអង្គារម្សិលម៉ិញនេះថា នឹងបញ្ជូនជំនួយយោធាបន្ថែមដល់អ៊ុយក្រែនជាមួយនឹងគ្រាប់កាំភ្លើងធំរាប់ម៉ឺនគ្រាប់នៅដំណាច់ឆ្នាំ។ ក្រសួងការពារជាតិចក្រភពអង់គ្លេសបាននិយាយនៅក្នុងសេចក្តីថ្លែងការណ៍មួយថា “ចក្រភពអង់គ្លេសបានបញ្ជូនគ្រាប់កាំភ្លើងធំជាង 300,000គ្រាប់ទៅឱ្យអ៊ុយក្រែន ហើយបានប្តេជ្ញាថានឹងផ្តល់គ្រាប់កាំភ្លើងធំរាប់ម៉ឺនគ្រាប់បន្ថែមទៀតនៅឆ្នាំនេះ”។នេះបើតាមរដ្ឋមន្ត្រីក្រសួងការពារជាតិ (Grant Shapps) បានប្រកាសនៅថ្ងៃនេះ។
ការផ្តល់ជំនួយបន្ថែមទៅឱ្យអ៊ុយក្រែននេះ បានកើតឡើងនៅពេលដែល Shapps បានចូលរួមកិច្ចប្រជុំលើកទី 15 នៃក្រុមទំនាក់ទំនងការពារជាតិអ៊ុយក្រែន (UDCG) នៅមូលដ្ឋានទ័ពអាកាសអាមេរិកនៅទីក្រុង Ramstein ប្រទេសអាល្លឺម៉ង់ រួមជាមួយលោក Tony Radakin ប្រធានបុគ្គលិកការពារជាតិ។ Shapps បានបញ្ជាក់សារជាថ្មីអំពី ការប្តេជ្ញាចិត្តឥតងាករេរបស់ប្រទេសខ្លួនចំពោះអ៊ុយក្រែន ហើយបាននិយាយថា ចក្រភពអង់គ្លេសបានសន្យាផ្តល់គ្រាប់កាំភ្លើងធំបន្ថែមទៀត ដើម្បីឱ្យទីក្រុង Kyiv ការពារខ្លួនប្រឆាំងនឹងការឈ្លានពានរបស់រុស្ស៊ី និងដណ្តើមយកទឹកដីដែលរុស្សីកាន់កាប់ដោយខុសច្បាប់នោះមកវិញ ។
Shapps បានបន្ថែមទៀតថា ដើម្បីធានាថា អ៊ុយក្រែនមានអ្វីដែលខ្លួនត្រូវការដើម្បីការពារខ្លួន នៅពេលចូលដល់រដូវរងារ យើងក៏បានកំណត់ពីរបៀបដែលចក្រភពអង់គ្លេសនឹងបន្តទៅមុខទៀតនៅក្នុងប៉ុន្មានខែខាងមុខនេះ នៅក្នុងតំបន់ជំនួយជាអាទិភាពរបស់យើង រួមទាំងការការពារដែនអាកាស និងសមត្ថភាពវាយប្រហាររយៈចម្ងាយឆ្ងាយ និងការបណ្តុះបណ្តាល៕
ប្រភព៖ A News
ប្រែសម្រួលដោយ៖ វាសនា