ធនាគារ ជីប ម៉ុង ខមមើសល ប៊ែង ម.ក បានបើកសម្ពោធជាផ្លូវការ សាខាថ្មីទី១៥ ដ៏ប្រណីតរបស់ខ្លួន នារសៀលថ្ងៃព្រហស្បតិ៍ទី២១ ខែកញ្ញា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់ លោកជំទាវបណ្ឌិត ជា សិរី អគ្គទេសាភិបាល ធនាគារជាតិនៃកម្ពុជា។
ការពង្រីកខ្លួនរបស់ធនាគារ ជីប ម៉ុង ទៅកាន់អគារពាណិជ្ជកម្មចម្រុះ ជីប ម៉ុង ថៅវើរ ដ៏ប្រណីតនេះ ជាគម្រោងវិនិយោគដែលមានទំហំទឹកប្រាក់ប្រមាណជាង ២៣០លានដុល្លារអាមេរិក ដែលបានឆ្លុះបញ្ចាំងពីការចាក់គ្រឹះដ៏រឹងមាំ និងវិសាលភាពរីកដុះដាលទៅមុខកាន់តែឆ្ងាយរបស់ធនាគារ ជីប ម៉ុង ដើម្បីកសាងកេរ្តិ៍ឈ្មោះ និងបង្កើនទំនុកចិត្តជាមួយប្រជាជនកម្ពុជាឱ្យកាន់តែមុតមាំ។
ឆ្លៀតក្នុងឱកាសនោះដែរ អ្នកឧកញ៉ា លាង ម៉េង សហស្ថាបនិកក្រុមហ៊ុន ជីប ម៉ុង និងជាប្រធានក្រុមប្រឹក្សាភិបាលធនាគារ ជីប ម៉ុង បានថ្លែងពីសេចក្តីរាយការណ៍ពីសមិទ្ធផល ដែលទទួលបាននាពេលកន្លងមកនោះថា៖ “បើទោះបីជាស្ថានភាពសេដ្ឋកិច្ចសកលលោកកំពុងជួបឧបសគ្គយ៉ាងណាក្តី បើគិតមកត្រឹមពាក់កណ្តាលឆ្នាំ ២០២៣នេះ ទ្រព្យសកម្មរបស់ធនាគារ ជីប ម៉ុង នៅតែអាចកើនឡើងរហូតដល់ ១៣០០លានដុល្លារអាមេរិក។ ដោយឡែកប្រាក់កម្ចីបានកើនឡើងដល់ ៧៧២លានដុល្លារអាមេរិក និងប្រាក់បញ្ញើបានកើនឡើងដល់ ១១០០លានដុល្លារអាមេរិក។
អ្នកឧកញ៉ា លាង ម៉េង បានមានប្រសាសន៍ទៀតថា៖ “ធនាគារកូនខ្មែរមួយនេះ បានបោះជំហានចូលទីផ្សារក្រោយគេបន្តិចមែន ប៉ុន្តែយើងមានភាគទុនិក ដែលមានយុទ្ធសាស្ត្រ និងចក្ខុវិស័យវែងឆ្ងាយ ក្នុងការប្រែក្លាយធនាគារ ជីប ម៉ុង ឱ្យក្លាយជាធនាគារឈានមុខគេ និងអាចឈរជើងលើទីផ្សាររាប់រយឆ្នាំទៅមុខទៀត”។
ទន្ទឹមនឹងនោះ លោកជំទាវបណ្ឌិត ជា សិរី អគ្គទេសាភិបាល ធនាគារជាតិនៃកម្ពុជា ក៏បានធ្វើការកោតសរសើរចំពោះ ធនាគារ ជីប ម៉ុង និងក្រុមហ៊ុន ជីប ម៉ុង ទាំងមូល ដែលតែងតែនាំមកជូនប្រជាជនកម្ពុជានូវផលិតផល និងសេវាកម្មជាច្រើន ប្រកបដោយគុណភាពខ្ពស់ ព្រមទាំងបានចូលរួមអភិវឌ្ឍន៍សេដ្ឋកិច្ច និងសង្គមជាតិកម្ពុជាផងដែរ។
សាខា ជីប ម៉ុង ថៅវើរ ស្ថិតនៅចំកណ្តាលបេះដូងរាជធានីភ្នំពេញ មានលក្ខណៈកាន់តែពិសេស និងប្រណីតជាងមុន ជាមួយទីតាំងធំទូលាយ និងបរិយាកាសប្រកបដោយផាសុកភាព ដើម្បីធានាថា ការផ្តល់ជូនសេវាកម្មកម្រិតស្តង់ដារ ជាមួយនឹងការយកចិត្តទុកដាក់ដ៏ល្អឥតខ្ចោះ ស្របតាមតម្រូវការរបស់អតិថិជន។ លើសពីនេះ ធនាគារ ជីប ម៉ុង ក៏មាន VIP Lounge នៅក្នុងសាខាថ្មីនេះ ដែលជាកន្លែងទទួលភ្ញៀវដ៏ប្រណីត ផ្តល់ជូនបទពិសោធន៍សេវាកម្មធនាគារផ្តាច់មុខជូនអតិថិជន ប្រកបដោយឯកជនភាព អាទិភាព និងអត្ថប្រយោជន៍ជាច្រើនផ្សេងទៀត ឆ្លុះបញ្ចាំងពីឧត្តមភាពរបស់អតិថិជន។
សូមរំឭកផងដែរថា ធនាគារ ជីប ម៉ុង ជាធនាគារឌីជីថលនៅកម្ពុជាដែលបានបង្កើតឡើងនៅឆ្នាំ២០១៩ ដែលបានពង្រីកខ្លួនកាន់តែខ្លាំងនៅប្រទេសកម្ពុជា។ បច្ចុប្បន្នធនាគារ ជីប ម៉ុង មានសាខាប្រតិបត្តិការសរុបចំនួន ១៥ ក្នុងនោះ ១២សាខានៅរាជធានីភ្នំពេញ និង ៣សាខាទៀតនៅខេត្តកំពង់ចាម បាត់ដំបង និងសៀមរាប៕
