ភ្នំពេញ៖ នារសៀលថ្ងៃទី ០១ ខែមេសានេះ សហព័ន្ធកីឡាប្រដាល់សកលកម្ពុជាបានកោះប្រជុំជាមួយនឹងក្រុមជម្រើសជាតិថ្នាល និង ជម្រើសជាតិឈុតធំ ដើម្បីណែនាំពីការចូលរួមប្រមូលផ្ដុំហ្វឹកហាត់ និងការស្នាក់នៅហូបចុក នៅក្នុងមជ្ឈមណ្ឌលជាតិហ្វឹកហ្វឺនកីឡា។ ជាមួយគ្នានេះដែរ សហព័ន្ធក៍បាន បន្ថែម ចែកជូន ឯកសណ្ឋានជម្រើសជាតិ ឆ្នាំ២០២៦ ជូនដល់កីឡាករកីឡាការិនីផងដែរ។កិច្ចប្រជុំនេះរៀបចំឡើងក្រោមអធិបតីភាព ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា នៅទីស្នាក់ការគណៈកម្មាធិការជាតិអូឡាំពិកកម្ពុជា។

ឯកឧត្តម ប៊ុយ សុភ័ណ្ឌ បានគូសបញ្ជាក់ថា ការប្រមូលផ្តុំហ្វឹកហាត់ក្នុងជំរុំរបស់ ក្រុមជម្រើសជាតិ ប្រដាល់សកលកម្ពុជា គឺចាប់ផ្តើមពីថ្ងៃទី ១ ខែ មេសា រហូតដល់ថ្ងៃទី ១ ខែ ធ្នូ ឆ្នាំ២០២៦ ទើបរំសាយ។

ឯកឧត្តមថា ការជួបជុំនាពេលនេះ គឺដើម្បីពិនិត្យ រៀបចំសម្រាប់ កីឡាករថ្នាល ធ្វើការសម្របសម្រួលជួយផ្តល់នូវភាពងាយស្រួលសម្រាប់កម្មវិធីហ្វឹកហាត់កុំឱ្យជាន់ ទៅនឹងកម្មវិធីសិក្សារបស់គេ ដោយនឹងមានការសម្របសម្រួលកន្លែងសិក្សា រៀនសូត្រ មកនៅជិតនឹងទីតាំងហ្វឹកហាត់តែម្តង។ ទន្ទឹមនឹងនោះ ក៏ពង្រឹងនូវវិន័យសម្រាប់ការហ្វឹកហាត់ និងកម្មវិធីប្រកួតដែល កីឡាករ កីឡាការិនី  នឹងត្រៀមខ្លួនចូលរួមក្នុងព្រឹត្តិការណ៍អន្តរជាតិឆ្នាំ ២០២៦ ពិសេស គឺកីឡាអាស៊ីហ្គេម នៅអំឡុងខែកញ្ញា ឆ្នាំ២០២៦ នៅប្រទេសជប៉ុន ដែលជាគោលដៅសំខាន់របស់សហព័ន្ធប្រដាល់សកលកម្ពុជាតែម្តង។

ឯកឧត្តម បានបន្ថែមទៀតថា សម្រាប់ការប្រមូលផ្តុំជម្រើសជាតិឆ្នាំ២០២៦នេះ សហព័ន្ធកីឡាប្រដាល់សកលកម្ពុជាក្រៅពីពង្រឹងទៅលើវិន័យ ក៏ដូចជាកម្មវិធីហ្វឹកហាត់ ក្នុងនោះសហព័ន្ធ ក៏បានធ្វើការណែនាំឱ្យកីឡាករ ត្រៀមចូលរួមការប្រកួតដែលជាការរៀបចំរបស់សហព័ន្ធ មានជាប្រចាំខែ ដែលជាការជំរុញអភិវឌ្ឍន៍សមត្ថភាព កីឡាករ កីឡាការិនីជម្រើសជាតិ។

សូមជម្រាបជូនផងដែរថា សម្រាប់កីឡាករថ្នាលជម្រើសជាតិ ក្នុងឆ្នាំ២០២៦នេះ នឹងមានការចែកចេញជា២ក្រុម ដោយមួយក្រុមគឺហ្វឹកហាត់សម្រួចត្រៀម  កីឡាយុវជនអាស៊ីហ្គេម ឆ្នាំ២០២៦  នៅប្រទេសអូបេគីស្ថាន និងមួយក្រុមទៀតសម្រួចការហ្វឹកហាត់ត្រៀម កីឡាយុវជនអាស៊ីហ្គេម  ដែលកម្ពុជាទទួលធ្វើជាម្ចាស់ផ្ទះក្នុងឆ្នាំ២០៣១៕

 

ដោយ៖ វិកគី