ភ្នំពេញ ៖ ក្រុមប្រឹក្សាភិបាលសហព័ន្ធកីឡាជនពិការអាស៊ាន បានបោះឆ្នោតគាំទ្រប្រទេសឥណ្ឌូណេស៊ី ឲ្យទទួលរៀបចំធ្វើជាម្ចាស់ផ្ទះ ការប្រកួតកីឡាជនពិការ អាស៊ានប៉ារ៉ាហ្គេម (ASEAN Para Games) លើកទី១១ ជំនួសប្រទេសវៀតណាម ដែលបានលុបចោលការងារធ្វើម្ចាស់ផ្ទះ ដោយសារជំងឺរាតត្បាតសកល Covid-19 ខណៈឯកឧត្តម យី វាសនា តំណាងសម្តេចតេជោ ហ៊ុន សែន ដែលក្លាយជាប្រធានក្រុមប្រឹក្សាកីឡាជនពិការអាស៊ានបន្តវេនបានចាត់ទុកថា នេះគឺជាឱកាសដ៏ល្អ សម្រាប់អត្តពលិកពិការ និងមន្ត្រីបច្ចេកទេស ត្រៀមឆ្ពោះទៅទទួលរៀបចំធ្វើជាម្ចាស់ផ្ទះ អាស៊ានប៉ារ៉ាហ្គេម លើកទី១២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា។

យោងតាមសេចក្តីប្រកាសព័ត៌មានរបស់ក្រុមប្រឹក្សាភិបាលសហព័ន្ធកីឡាជនពិការអាស៊ាន កាលពីថ្ងៃទី១៥ ខែមករា ឆ្នាំ២០២២ បានបង្ហាញពីកិច្ចប្រជុំបន្ទាន់មួយ ដែលប្រធានភាគច្រើននៃគណៈកម្មាធិការជាតិប៉ារ៉ាឡាំពិក (NPCs)រៀងៗខ្លួន បានពិភាក្សាអំពីការដេញថ្លៃរបស់ប្រទេសឥណ្ឌូណេស៊ី ដើម្បីធ្វើជាម្ចាស់ផ្ទះជំនួសការប្រកួតអាស៊ានប៉ារ៉ាហ្គេម លើកទី១១ បន្ទាប់ពីការលុបចោលដោយម្ចាស់ផ្ទះដើម គឺវៀតណាម កាលពីឆ្នាំមុន។

ប្រទេសឥណ្ឌូណេស៊ី បានស្នើការប្រកួតនេះ ចាប់ពីថ្ងៃទី២០-៣១ ខែកក្កដា ឆ្នាំ២០២២ លើ១៣ប្រភេទកីឡា នៅទីកន្លែងផ្សេងៗគ្នា ជុំវិញទីក្រុង Solo។ លោក Senny Marbun ប្រធាន NPC Indonesia បានសម្តែងក្តីរីករាយចំពោះទំនុកចិត្តពីបណ្តាលប្រទេសអាស៊ាន។

លោក Senny Marbun បានលើកឡើងថា ឥណ្ឌូណេស៊ី បានរៀបចំការប្រកួតកីឡាប៉ារ៉ាហ្គេមធំៗចំនួនពីរ ក្នុងរយៈពេល១០ឆ្នាំចុងក្រោយនេះ គឺ ASEAN Para Games លើកទី៦ នៅទីក្រុង Solo ឆ្នាំ២០១១ និង Asian Para Games ឆ្នាំ២០១៨ នៅទីក្រុង Jakarta នោះ ដោយលោកបានធានាថា រាល់សម្ភារបរិក្ខារ លក្ខខណ្ឌបច្ចេកទេស និងការត្រៀមរៀបចំ ASEAN Para Games លើកទី១១ ត្រូវបានត្រៀមរួចរាល់។

ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា ដែលដឹកនាំកិច្ចប្រជុំ ក្នុងនាមជាតំណាងប្រធានក្រុមប្រឹក្សាភិបាលសហព័ន្ធកីឡាជនពិការអាស៊ាន មានប្រសាសន៍ថា ក្រុមប្រឹក្សាភិបាលសហព័ន្ធកីឡាជនពិការអាស៊ាន ទុកពេលឲ្យឥណ្ឌូណេស៊ីបង្ហាញឯកសារពាក់ព័ន្ធមួយចំនួន និងទុកពេល១ខែសម្រាប់ការដេញថ្លៃ ដើម្បីទទួលបានសិទ្ធិផ្លូវការ ក្នុងការទទួលរៀបចំធ្វើម្ចាស់ផ្ទះ អាស៊ានប៉ារ៉ាហ្គេម លើកទី១១នេះ។ កិច្ចប្រជុំនេះ គឺដើម្បីរៀបចំការប្រកួតកីឡាជនពិការអាស៊ាននេះឡើងវិញ បន្ទាប់ពីម្ចាស់ផ្ទះចំនួនពីរ បានលុបចោល២លើក (រយៈពេល៤ឆ្នាំ) គឺម្ចាស់ផ្ទះ ហ្វីលីពីន លុបចោល កាលពីឆ្នាំ២០១៩ និងម្ចាស់ផ្ទះ វៀតណាម សម្រេចលុបចោលមិនរៀបចំ នៅឆ្នាំ២០២១ (ដោយទទួលធ្វើម្ចាស់ផ្ទះតែ ស៊ីហ្គេម)។ ការលុបចោលចំនួន២ព្រឹត្តិការណ៍នេះ គឺជាក្តីបារម្ភរបស់អាស៊ាន ដែលអត្តពលិកពិការ រួមទាំងគណៈកម្មការបច្ចេកទេសមិនបានដុះខាត់សមត្ថភាពជំនាញរបស់ខ្លួន ព្រមទាំងជះឥទ្ធិផលមិនល្អ ដល់គុណភាពបច្ចេកទេសរបស់អត្តពលិកក្នុងតំបន់ផងដែរ។

ឯកឧត្តមអគ្គលេខាធិការបានបន្ថែមថា ប្រសិនបើការប្រកួតកីឡាជនពិការអាស៊ាន លើកទី១១នេះ អាចដំណើរការបាននោះ ការបញ្ជូនអត្តពលិកពិការកម្ពុជា ក៏នឹងអាចចូលរួមប្រកួតប្រជែង ក្នុងការកសាងសមត្ថភាពបន្ថែម ត្រៀមឆ្ពោះទទួលរៀបចំធ្វើជាម្ចាស់ផ្ទះ អាស៊ានប៉ារ៉ាហ្គេម លើកទី១២ នាឆ្នាំ២០២៣ បានកាន់តែល្អប្រសើរផងដែរ។ បច្ចុប្បន្ន កីឡាករ កីឡាការិនីពិការកម្ពុជា កំពុងហ្វឹកហាត់បិទខ្ទប់បានច្រើនប្រភេទកីឡាដែរ ក្រោមការទំនុកបម្រុងពីក្រសួងអប់រំ យុវជន និងកីឡា ហើយប្រសិនបើនៅក្នុងឆ្នាំ២០២២នេះ មានការប្រកួតអន្តរជាតិកាន់តែច្រើននោះ ការត្រៀមខ្លួនរបស់ប្រភេទកីឡាពិការ សម្រាប់ការធ្វើម្ចាស់ផ្ទះ អាស៊ានប៉ារ៉ាហ្គេម លើកទី១២ ឆ្នាំ២០២៣ ក៏មានឱកាសកាន់តែច្រើន ក្នុងការប្រជែងមេដាយ ព្រមទាំងផ្តល់ពិសោធន៍កាន់តែច្រើន សម្រាប់មន្ត្រីរដ្ឋបាល មន្ត្រីបច្ចេកទេសពិការផងដែរ។ ដូច្នេះ វាពិតជាសំខាន់ណាស់ ដែលកម្ពុជាគាំទ្រពេញទំហឹង ឲ្យមានការប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ីនេះ ដើម្បីគោលដៅឆ្ពោះទៅទទួលធ្វើម្ចាស់ផ្ទះ អាស៊ានប៉ារ៉ាហ្គេម ឆ្នាំ២០២៣ ក្រោយពីបញ្ចប់ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ប្រមាណជា ២សប្តាហ៍៕