ភ្នំពេញ៖ យុវជនមានគ្នា៣នាក់ជិះម៉ូតូហុងដាមួយគ្រឿងឌុបគ្នាពេលឈប់នោម ស្រាប់តែមានជនសង្ស័យមានគ្នា២នាក់ប្រដាប់ដោយដំបងទីបមកដេញវាយប្លន់យកម៉ូតូជិះគេចខ្លួនបាត់។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៣ និង៥០នាទីទៀបភ្លឺ ថ្ងៃទី០៧ ខែឧសភា ឆ្នាំ២០២៦ ស្ថិតតាមបណ្ដោយផ្លូវបេតុងឌួងងៀប សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
តាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះមានគ្នា៣នាក់ជិះម៉ូតូហុងដាឌ្រីមមួយគ្រឿងស៊េរីឆ្នាំ២០២៤ ចេញពីម្តុំផ្សារបឹងបៃតង បំណងទៅលេងសង្សារនៅម្តុំទួលពង្រ លុះមកដល់ចំណុចកើតហេតុស្រាប់តែឈប់នោមដោយមិនបានដកសោរម៉ូតូចេញនោះទេ ។
ប្រភពដដែលបានបន្តថា ខណៈកំពុងឈរនោម ស្រាប់តែមានជនសង្ស័យ២នាក់ប្រដាប់ដោយដំបងទីប ដើរមកធ្វើសកម្មភាពវាយធាក់ប្លន់យកម៉ូតូបានសម្រេចជិះរត់គេចខ្លួនទៅបាត់ ។
ក្រោយពេលកើតហេតុសមត្ថកិច្ចមូលដ្ឋានបានចុះមកនាំខ្លួនជនរងគ្រោះទៅប៉ុស្តិ៍នគរបាលរដ្ឋបាលអូរបែកក្អមដើម្បីសួរនាំ និងដាក់ពាក្យបណ្ដឹង និងបន្តធ្វើស្រាវជ្រាវរកមុខសញ្ញាជនសង្ស័យមកផ្ដន្ទាទោសតាមផ្លូវច្បាប់ ៕
ដោយ៖ វិសាល
