សហរដ្ឋអាមេរិកបាននិយាយកាលពីថ្ងៃព្រហស្បតិ៍ម្សិលម៉ិញនេះថា ខ្លួនបានប្តូរទិសនាវាពាណិជ្ជកម្មចំនួន 72គ្រឿង និងបិទ 4គ្រឿងផ្សេងទៀតដើម្បីអនុវត្តការបិទផ្លូវរបស់លោកប្រធានាធិបតី Donald Trump នៅលើនាវាដែលធ្វើដំណើរទៅឬមកពីកំពង់ផែអ៊ីរ៉ង់ឆ្លងកាត់ច្រកសមុទ្រ Hormuz ។ បញ្ជាការកណ្តាលអាមេរិក (CENTCOM) បាននិយាយនៅលើវេទិកាប្រព័ន្ធផ្សព្វផ្សាយសង្គមរបស់សហរដ្ឋអាមេរិក X ថា “ចាប់តាំងពីការចាប់ផ្តើមនៃការបិទច្រកសមុទ្រ Hormuzនោះមក កងកម្លាំង CENTCOM បានប្តូរទិសនាវាពាណិជ្ជកម្មចំនួន 72គ្រឿង ។
ភាពតានតឹងក្នុងតំបន់នៅតែមានកម្រិតខ្ពស់ចាប់តាំងពីសហរដ្ឋអាមេរិក និងអ៊ីស្រាអែលបើកការវាយប្រហារប្រឆាំងនឹងអ៊ីរ៉ង់កាលពីថ្ងៃទី 28 ខែកុម្ភៈ ដែលបណ្តាលឱ្យមានការវាយប្រហារសងសឹកដោយទីក្រុងតេអេរ៉ង់ប្រឆាំងនឹងអ៊ីស្រាអែល និងសម្ព័ន្ធមិត្តរបស់សហរដ្ឋអាមេរិកនៅក្នុងបណ្តាប្រទេសឈូងសមុទ្រ រួមជាមួយនឹងការបិទច្រកសមុទ្រ Hormuz ។
បទឈប់បាញ់បានចូលជាធរមាននៅថ្ងៃទី ៨ ខែមេសា តាមរយៈការសម្របសម្រួលរបស់ប៉ាគីស្ថាន ប៉ុន្តែកិច្ចពិភាក្សានៅទីក្រុងអ៊ីស្លាម៉ាបាដបានបរាជ័យក្នុងការបង្កើតកិច្ចព្រមព្រៀងយូរអង្វែង។ ក្រោយមកលោក Trump បានបន្តបទឈប់បាញ់ដោយគ្មានកំណត់ ខណៈពេលដែលរក្សាការបិទផ្លូវលើនាវាដែលធ្វើដំណើរទៅ ឬមកពីកំពង់ផែអ៊ីរ៉ង់ តាមរយៈផ្លូវទឹកយុទ្ធសាស្ត្រ។
ច្រកសមុទ្រ Hormuz គឺជាច្រកថាមពលដ៏សំខាន់មួយរបស់ពិភពលោក ដោយភ្ជាប់ឈូងសមុទ្រជាមួយឈូងសមុទ្រអូម៉ង់ និងទីផ្សារអន្តរជាតិ។ ការរអាក់រអួលនៅក្នុងតំបន់នេះបានជំរុញឱ្យមានការព្រួយបារម្ភអំពីការផ្គត់ផ្គង់ប្រេង ឥន្ធនៈ និងឧស្ម័នសកល ចាប់តាំងពីការចាប់ផ្តើមនៃសង្រ្គាមអ៊ីរ៉ង់៕
ប្រភព៖ A News
ប្រែសម្រួលដោយ៖ វាសនា
