ភ្នំពេញ៖ បុរសម្នាក់ដែលគេដឹងថា ជាសមត្ថកិច្ចចូលនិវត្តន៍បានយកកាំភ្លើងធ្វើអត្តឃាត ដោយបាញ់សម្លាប់ខ្លួនឯង បានបង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋានចុះទៅហ៊ុមព័ទ្ធខ្សែភ្លាមៗ។ហេតុការណ៍នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង៥និង២០នាទីទៀបភ្លឺឈានចូលថ្ងៃទី១៨ ខែឧសភា ឆ្នាំ២០២៦ ស្ថិតនៅក្បែរផ្លូវ៦០ម៉ែត្រ(ក្រោយផ្សាររាត្រី៦០ម៉ែត្រ) សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
បើតាមព័ត៌មានពីបុរសម្នាក់ដែលដើរហាត់ប្រាណនៅកន្លែងកើតហេតុបានឱ្យដឹងថា មុនពេលកើតហេតុរូបគាត់បានដើរហាត់ប្រាណដូចសព្វដងស្រាប់តែប្រទះឃើញបុរសម្នាក់បានដេកស្លាប់នៅលើផ្លូវខាងលើដោយមានឃើញកាំភ្លើងវែងមួយដើមនៅក្បែរខ្លួនអ្នកស្លាប់ និងម៉ូតូមួយគ្រឿងផងដែរ ហើយរូបគាត់ក៏បានរាយការណ៍ទៅសមត្ថកិច្ចមូលដ្ឋានចុះមកទីតាំងកើតហេតុ។
ក្រោយពេលកើតហេតុសមត្ថកិច្ចជំនាញខាងកោសល្យវិច័យបានចុះមកធ្វើការត្រួតពិនិត្យ និងធ្វើលិខិតប្រគល់សពឲ្យសាច់ញាតិយកទៅធ្វើបុណ្យតាមប្រពៃណី។
បើតាមព័ត៌មានបឋមដែលទទួលបានពីសាច់ញាតិជនរងគ្រោះបានឱ្យដឹងថា ជនរងគ្រោះមានជំងឺបាក់ទឹកចិត្ត ហើយក៏មានជំងឺប្រចាំកាយផងដែរ គេងមិនសូវលក់ ដែលធ្វើឱ្យគាត់គិតច្រើន ប្រហែលជាមកពីមូលហេតុនេះហើយ ទើបធ្វើឱ្យគាត់សម្រេចចិត្តបែបនេះ៕
ដោយ៖ វិសាល
