អារ៉ាប៊ីសាអូឌីតបាននិយាយថា ខ្លួនបានស្ទាក់ចាប់កាំជ្រួចផ្លោងមួយគ្រាប់ ដែលបានបាញ់ឆ្ពោះទៅទីក្រុងរីយ៉ាដ កាលពីថ្ងៃចន្ទ ទី១២ ខែតុលា ខណៈដែលចលនា Houthi របស់ប្រទេសយេម៉ែន បានអះអាងពីការវាយប្រហារមួយផ្សេងទៀត សំដៅទៅលើអាកាសយានដ្ឋានអន្តរជាតិ King Khalid។

ឧបទ្ទវហេតុដែលបានរាយការណ៍នេះគឺជាថ្ងៃទីបីជាប់ៗគ្នានៃការវាយប្រហារកាន់តែខ្លាំងឡើងៗពាក់ព័ន្ធនឹងរដ្ឋធានីអារ៉ាប៊ីសាអូឌីត និងអាកាសយានដ្ឋានអន្តរជាតិដ៏សំខាន់របស់ខ្លួន ដែលបង្កើនការព្រួយបារម្ភអំពីស្ថានភាពសន្តិសុខ និងសក្តានុពលសម្រាប់ការកើនឡើងក្នុងតំបន់បន្ថែមទៀត។

ការវិវឌ្ឍចុងក្រោយបំផុតបានកើតឡើង បន្ទាប់ពីការវាយប្រហារដ៏សាហាវរយៈពេលពីរថ្ងៃលើអាកាសយានដ្ឋានដែលត្រូវបានរាយការណ៍ថា បានសម្លាប់មនុស្សយ៉ាងហោចណាស់ចំនួន 14 នាក់ និងរាប់រយនាក់ទៀតរងរបួស។ នេះបើយោងតាមការអះអាងរបស់អាជ្ញាធរអារ៉ាប៊ីសាអូឌីត និងរបាយការណ៍ដែលដកស្រង់ដោយ Reuters និង Associated Press ។ តួលេខជនរងគ្រោះទាំងនេះមិនត្រូវបានផ្ទៀងផ្ទាត់ដោយឯករាជ្យនៅឡើយទេ។

ជាការឆ្លើយតបទៅនឹងការគំរាមកំហែងផ្នែកសន្តិសុខកាន់តែខ្លាំងឡើង អាជ្ញាធរអារ៉ាប៊ីសាអូឌីតតាមសេចក្តីរាយការណ៍បានបន្តការបិទអាកាសយានដ្ឋាន Riyadh រហូតដល់ថ្ងៃទី 17 ខែតុលា។ ក្រុមហ៊ុនអាកាសចរណ៍ជាច្រើនក៏បានលុបចោល ឬផ្អាកជើងហោះហើរ ដែលរំខានដល់ការធ្វើដំណើរតាមផ្លូវអាកាស និងប៉ះពាល់ដល់អ្នកដំណើរដែលធ្វើដំណើរទៅ និងមកពីព្រះរាជាណាចក្រមួយនេះ។

ការបាញ់មីស៊ីលដែលត្រូវបានរាយការណ៍ និងការអះអាងរបស់ក្រុមHouthi កើតឡើងចំពេលមានភាពតានតឹងកាន់តែខ្លាំងឡើងរវាងអារ៉ាប៊ីសាអូឌីត និងចលនាយេម៉ែន ដែលបង្កើនការភ័យខ្លាចថា ការប្រឈមមុខដាក់គ្នាអាចកាន់តែខ្លាំងឡើងថែមទៀត។

ការបន្តរំខានដល់ប្រតិបត្តិការអាកាសយានដ្ឋានក៏បានបង្ហាញពីផលវិបាកដែលអាចកើតមានសម្រាប់អាកាសចរណ៍ក្នុងតំបន់ សកម្មភាពពាណិជ្ជកម្ម និងការធ្វើដំណើររបស់ជនស៊ីវិល ប្រសិនបើការវាយប្រហារនៅតែបន្តកើតមាន។

ស្ថានការណ៍នៅតែតានតឹង ដោយមានការវិវឌ្ឍន៍បន្ថែមទៀតត្រូវបានរំពឹងទុក នៅពេលដែលអាជ្ញាធរអារ៉ាប៊ីសាអូឌីត ឆ្លើយតបទៅនឹងការគំរាមកំហែងដោយក្រុម Houthi៕

  

ប្រភព៖ Bright News

ប្រែសម្រួលដោយ៖ វាសនា