ភ្នំពេញ ៖ ឯកឧត្តម ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការ អន្តរជាតិ ថ្លែងនៅក្នុងក្នុងពិធីបើកសន្និសីទអន្តរជាតិ ស្តីពី “ការពង្រឹងតួនាទីស្ត្រីក្នុងការកសាង និងការថែរក្សាសន្តិភាព៖ ពីការប្តេជ្ញាចិត្តរហូតដល់លទ្ធផល” កាលពីទី០៧ ខែធ្នូ ម្សិលមិញ តាមរយៈប្រព័ន្ធវីដេអូថា ស្ត្រី និងក្មេងស្រី មានអំណាចក្នុងការផ្លាស់ប្តូរ និងជំរុញការអភិវឌ្ឍប្រកបដោយវិជ្ជមាន។ ពួកគេអាចចូលរួមចំណែកជួយកសាងសង្គមប្រកបដោយភាពត្រឹមត្រូវ បរិយាប័ន្ន វិបុលភាព និងសន្តិភាព។ ទោះបីជាយ៉ាងណាក៏ដោយ ផ្នត់គំនិតអំពីសក្ដានុពល និងការពាក់ព័ន្ធរបស់ស្ត្រី និងក្មេងស្រី នៅតែបន្តកើតមាន ជាពិសេស ក្នុងវិស័យកសាង សន្តិភាព និងសន្តិសុខ។
ឯកឧត្តម ប្រាក់ សុខុន បញ្ជាក់ថា សមភាពយេនឌ័រ គឺជាតម្លៃស្នូលមួយក្នុងចំណោមតម្លៃស្នូលជាច្រើនទៀត ដែលបានគាំទ្រដោយរាជរដ្ឋាភិបាលកម្ពុជា និងត្រូវបានបញ្ជ្រាបទៅក្នុងយុទ្ធសាស្ត្រ និងគោលនយោបាយអភិវឌ្ឍន៍ជាតិនៅគ្រប់កម្រិត។
ដោយមានកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា បច្ចុប្បន្នមន្ត្រីរាជការជាស្ត្រីមានចំនួន៤១ភាគរយ ក្នុងចំណោមមន្ត្រីរាជការសរុប ទាំងអស់ ក្នុងឆ្នាំ ២០២០ ហើយតួលេខនេះ កំពុងតែកើនឡើងក្នុងតួនាទីជាអ្នកដឹកនាំ និងក្នុងមុខតំណែងជាអ្នកធ្វើសេចក្តីសម្រេចចិត្ត។ ស្ត្រីកម្ពុជាបច្ចុប្បន្នបានទទួលនូវការគាំទ្រ និងការគាំពារសង្គមកាន់តែប្រសើរឡើង តាមរយៈការជំរុញឱ្យទទួលបានការថែរក្សាសុខភាព ការការពារផ្នែកច្បាប់ និងយុត្តិធម៌ប្រឆាំងនឹងអំពើហិង្សា ការជួញដូរមនុស្ស និងការកេងប្រវ័ញ្ចផ្លូវភេទ ហើយធនធានសេដ្ឋកិច្ច ដូចជា តាមរយៈការពង្រីកឥណទានសម្រាប់ សហគ្រាសធុនតូចបំផុត តូច និងមធ្យម ដែលមានចំនួន៦១ភាគរយ គ្រប់គ្រងដោយស្ត្រី។
ឯកឧត្តម ប្រាក់ សុខុន បន្តថា ចាប់តាំងពីឆ្នាំ២០០៦ កម្ពុជាបានបញ្ជូនកងរក្សាសន្តិភាពជាស្ត្រីចំនួន៤១៩នាក់ ក្នុងចំណោមកងរក្សាសន្តិភាព សរុបចំនួន ៧.១២៣ នាក់ ទៅកាន់បេសកកម្មថែរក្សាសន្តិភាពរបស់អង្គការសហប្រជាជាតិ នៅក្នុងប្រទេសចំនួន៩។ ឆ្នាំនេះ ស្ត្រីចំនួន៩២នាក់ ក្នុងចំណោមកងរក្សាសន្តិភាពកម្ពុជាចំនួន៧៨១នាក់ កំពុងបំពេញបេសកកម្មថែរក្សាសន្តិភាពនៅប្រាំប្រទេស។ បច្ចុប្បន្នកម្ពុជាជាប់ចំណាត់ ថ្នាក់លេខ២ នៅក្នុងអាស៊ាន បន្ទាប់ពីប្រទេសឥណ្ឌូនេស៊ី និងជាប់ចំណាត់ថ្នាក់លេខ១៧ ក្នុងពិភពលោក ដែលបានបញ្ជូនកងទ័ពជាស្ត្រី ចូលរួមប្រតិបត្តិការថែរក្សាសន្តិភាពរបស់អង្គការសហប្រជាជាតិ៕