ភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានបញ្ជាក់ ក្រោយមានការចុះផ្សាយដោយសារព័ត៌មានមួយចំនួន មានការភាន់ច្រឡំលើគ្រោងការទិញវ៉ាក់សាំងរបស់ប្រទេសកម្ពុជា ថា កម្ពុជាបានបញ្ជាទិញវ៉ាក់សាំងទៅមជ្ឈមណ្ឌលកូវ៉ាក់ (COVAX Facility) ចំនួនមួយលានដូស ដែលនឹងទទួលបានជាដំណាក់កាលៗ។
លោកជំទាវបន្តថា វ៉ាក់សាំងដែលកម្ពុជាបញ្ជាទិញនេះ តម្រូវឲ្យមានការវាយតម្លៃគុណភាពនិងប្រសិទ្ធិភាពជាមុនដោយអង្គការសុខភាពពិភពលោក ទើបមជ្ឈមណ្ឌលកូវ៉ាក់ធ្វើការបែងចែក មកបណ្តាប្រទេស កំពុងអភិវឌ្ឍន៌ដែលជាសមាជិករបស់មជ្ឈមណ្ឌលនេះ។
លោកជំទាវបន្តទៀតថា កម្ពុជានឹងទទួលបានវ៉ាក់សាំងនៅពេលណានោះ គឺមិនទាន់ដឹងបាននៅពេលនេះនៅឡើយទេ ដោយ អាស្រ័យលើមជ្ឈមណ្ឌលកូវ៉ាក់នឹងទទួលបានវ៉ាក់សាំងកូវីដ-១៩ នៅពេលណាដែរ ហើយអង្គការសុខភាពពិភពលោក បានវាយតម្លៃវ៉ាក់សាំងនោះជាមុននូវប្រសិទ្ធិភាព និងគុណភាពវ៉ាក់សាំងនោះឲ្យបានរួចរាល់ជាមុនដែរមុននឹងធ្វើការបែងចែក)។
ដូច្នេះ ប្រសិនបើក្រុមហ៊ុនផលិតវ៉ាក់សាំងពីប្រទេសណាមួយ រួមទាំងប្រទេសចិនផងដែរនោះ អាចផលិតបានសម្រេចផលចុងក្រោយ ហើយផ្គត់ផ្គង់ទៅមជ្ឈមណ្ឌលកូវ៉ាក់តាមការឯកភាពគ្នាជាមុននោះ ហើយអង្គការសុខភាពពិភលោកក៏បានវាយតម្លៃប្រសិទ្ធិភាពនិងគុណភាពរួចរាល់ជាមុនដែរនោៗសមភាព នៃការបែងចែកនឹងត្រូវបានធ្វើទៅតាម សភាពជាក់ស្តែង នៃចំនួនវ៉ាក់សាំងដែលទទួលបានដែលត្រូវបែងចែកឲ្យទៅបណ្តាប្រទេសដែលជាសមាជិកដោយមជ្ឈមណ្ឌលកូវ៉ាក់នេះតែម្តង។
លោកជំទាវក៏សូមកុំមានការពន្យល់ ឫបកស្រាយណាមួយដែលផ្ទុយទៅនឹងគោលការណ៌ដែលកម្ពុជា បានប្រកាន់យក ជាពិសេសសូមលោកអ្នក មេត្តាកុំលើកយកប្រសាសន៌ដ៏ខ្ពង់ខ្ពស់ របស់សម្តេចតេជោនាយករដ្ឋមន្រ្តី ដែលបានថ្លែងការណ៌ជូនបងប្អូនជនរួមជាតិ នាព្រឹកថ្ងៃទី១៥ ខែធ្នូ ឆ្នាំ២០២០ កន្លងមកនេះ មកបកស្រាយខុសដូច្នេះអីណា។ បើចង់ quote ប្រសាសន៌សម្តេចតេជោ សូមមេត្តា លើកយកចំណុចណាមួយទាំងស្រុងតែម្តង ចៀសវាងការសរសេរខុស បកស្រាយខុស ឫការភ័ន្តច្រឡំណាមួយដែលអាចកើតមាន៕
