ខេត្តព្រះសីហនុ៖ បើតាមការបញ្ជាក់ពីមន្ត្រីអាជ្ញាធរមូលដ្ឋាន ឃុំស្ទឹងឆាយ បានឱ្យដឹងនៅរសៀលថ្ងៃអាទិត្យទី១៩ ខែកុម្ភៈ ឆ្នាំ២០២៣នេះថា មានករណីគ្រោះថ្នាក់ចរាចរណ៍ បណ្ដាលឱ្យបុរសជនជាតិចិនម្នាក់ស្លាប់ និងស្ត្រីម្នាក់ទៀតបានរងរបួសធ្ងន់ ដោយសារក្រឡាប់រថយន្តលើផ្លូវល្បឿនលឿនក្នុងទិសដៅពីភ្នំពេញ ទៅកាន់ខេត្តព្រះសីហនុ។
ករណីនេះបានកើតឡើងកាលពីរសៀលថ្ងៃទី ១៩ ខែកុម្ភៈ ឆ្នាំ២០២៣ ស្ថិតនៅត្រង់ចន្លោះបង្កោលគីឡូម៉ែត្រលេខ ១៣៤,១៣៥ ក្នុងភូមិស្ទឹងឆាយ ឃុំស្ទឹងឆាយ ស្រុក កំពង់សិលា ខេត្តព្រះសីហនុ ។
ប្រភពដដែលបានបន្តថា មុនពេលកើតហេតុ គេឃើញរថយន្តឡង់គ្រីស័រមួយគ្រឿងពណ៌ខ្មៅ ពាក់ស្លាកលេខ ភ្នំពេញ2AX1188 ធ្វើដំណើរពីភ្នំពេញ ឆ្ពោះមកក្រុងព្រះសីហនុ ក្នុងល្បឿនយ៉ាងលឿន មកដល់ចំណុចកើតហេតុបានផ្ទុះកង់ក្រោយ បណ្តាលឱ្យក្រឡាប់ធ្លាក់ផ្លូវតែម្តង។
បន្ទាប់ពីកើតហេតុ គេឃើញរថយន្តសង្គ្រោះរបស់មណ្ឌលសុខាភាព តក្កវិទ ស្រុកកំពង់សិលា បានមកជួយសង្គ្រោះ ដឹកសាកសព និងជនរងគ្រោះទៅរក្សាទុក និងសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ ដើម្បីប្រគល់ជូនស្ថានទូតចាត់ចែងបន្ត៕
ដោយ៖ វិសាល