ភ្នំពេញ ៖ កីឡាការិនីដ៏ឆ្នើម ខាន់ ចេសា នឹងឡើងបង្ហាញខ្លួនលើកដំបូងនៅលើសង្វៀន ONE Championship ក្នុងការប្រកួតដណ្តើមខ្សែក្រវាត់។ នេះបើយោងតាមគេហទំព័រផ្លូវការរបស់Cambodia 2023 ដែលបានបង្ហោះ នៅរសៀលថ្ងៃសុក្រ ទី១៥ ខែកញ្ញា ឆ្នាំ២០២៣នេះ ។
វីរៈកីឡាការិនីជឺជីតស៊ូឆ្នើមកម្ពុជា ខាន់ ចេសា នឹងបង្ហាញខ្លួនលើកដំបូងលើសង្វៀន ONE Championship ក្នុងការប្រកួតដណ្តើមខ្សែក្រវាត់ជាមួយកីឡាការិនីអាមេរិក Danielle Kelly ក្នុងកម្មវិធី ONE Fight Night 14 នៅសិង្ហបុរី នាថ្ងៃទី២៩ ខែកញ្ញា ឆ្នាំ២០២៣ ខាងមុខនេះ មុនបន្ដដំណើរមកកម្ពុជា ដើម្បីចេញទៅប្រកួតកីឡាអាស៊ី Asian Games លើកទី១៩ នៅទីក្រុង Hangzhou ប្រទេសចិន នាដើមខែក្រោយ ។
សូមជម្រាបផងដែរថា ខាន់ ចេសា កើតនៅថ្ងៃទី ០៨ ខែតុលា ឆ្នាំ ២០០១ ជាកីឡាការិនីជឺជិតស៊ូ ជនជាតិខ្មែរ – ម៉ិកស៊ិក – អាមេរិកាំង។ នាងបានប្រកួតតំណាងឱ្យកម្ពុជាក្នុងការប្រកួតកីឡាអាស៊ីឆ្នាំ២០១៨ និងដណ្តើមបានមេដាយមាសក្នុងវិញ្ញាសានេវ៉ាហ្សាទម្ងន់៤៩គីឡូផ្នែកនារី ។ នេះក៏ជាមេដាយមាសដំបូងគេដែលកម្ពុជាទទួលបានផងដែរ ដែលបានឈ្នះក្នុងប្រភេទកីឡាជឺជិតស៊ូ ក្នុងព្រឹត្តិការណ៍ Asian Games 2018 ។ ចេសា ក៏ជាអ្នកឈ្នះមេដាយមាសទីពីរក្នុងប្រវត្តិសាស្ត្រកីឡា Asian Games របស់កម្ពុជា បន្ទាប់ពីព្រឹត្តិការណ៍ Taekwondo Gold 2014 កន្លងមក នាងបានឈ្នះក្នុងការប្រកួតលំដាប់អន្តរជាតិជាច្រើន ដែលនាំមុខមាត់ជូនកម្ពុជាជានិច្ច ៕
ដោយ៖ វិកគី
