ភ្នំពេញ៖ កូនប្រុសអធិរាជកែងឆេះជង្គង់ហោះអេភូថងទាំងពីររូបបានសាងកេរ្ត៍ឈ្មោះជូនគុនខ្មែរជាថ្មី ក្រោយពីបំបាក់ម្ចាស់ផ្ទះជប៉ុនទទួលជ័យជំនះមកប្រទេសវិញ។កីឡាករអេ អាំម៉ារីនភូថង និងម៉ឺន មេឃា បានចេញទៅប្រកួតនៅប្រទេសជប៉ុនកាលពីម្សិលម៉ិញនេះ នៅលើសង្វៀនKnock Out ដ៏ល្បីរបស់ប្រទេសជប៉ុន ហើយក៏បានធ្វើឲ្យអ្នកគាំទ្រនូវប្រទេសជប៉ុនភ្ញាក់ផ្អើល សមត្ថភាពរបស់កីឡាករគុនខ្មែរទាំងពីររូបនេះ ។
កីឡាករអេ អាំម៉ារីនភូថង បានធ្វើឲ្យដៃគូបោះបង់ការប្រកួតនៅក្នុងដើមទឹកទីបី ខណៈដែលម៉ឺនមេឃាឈ្នះពិន្ទុដាច់លើគូប្រកួតម្ចាស់ផ្ទះជប៉ុនដូចគ្នា ទទួលបានទឹកប្រាក់២០ម៉ឺនយេន ។
ក្រោយពីយកឈ្នះគូប្រកួតដែលជាជើងខ្លាំងប្រចាំសង្វៀនដ៏ល្បីឈ្មោះនៅទីនោះភ្លាម អ្នកគាំទ្រគ្រប់គ្នាបានកោតសរសើរលើបណ្ដាញសង្គមព្រោងព្រាត ចំពោះសមត្ថភាពរបស់កីឡាករវ័យក្មេងទាំងពីររូបនេះ ។
គួរជម្រាបផងដែរថា នេះគឺជាកិត្តិយសថ្មីទៀត ដែលស្ថានីយទូរទស្សន៍ថោន បានរួមសហការជាមួយក្រុមហ៊ុន GANZBERG BEER ដឹកនាំកីឡាករទៅប្រកួតនៅក្រៅប្រទេស លើសង្វៀនដ៏ធំប្រចាំប្រទេសជប៉ុនជាថ្មី តែលើកនេះហាក់ជោគជ័យខ្លាំងជាងលើកមុន ដោយកីឡាករគុនខ្មែរ២រូប បានយកឈ្នះលើការប្រកួតទាំងពីររូប ថែមទាំងប្រើប្រាស់បច្ចេកទេសវាយបានយ៉ាងល្អ ធ្វើឲ្យបរទេសកាន់តែចាប់អារម្មណ៍មកលើគុនខ្មែរកាន់តែច្រើនបន្ថែមទៀត៕
ដោយ៖ វិកគី
