ភ្នំពេញ៖ ជនសង្ស័យ២នាក់ជិះម៉ូតូមួយគ្រឿងបានធ្វើសកម្មភាពឆក់កាបូបពីនារីម្នាក់ដែលកំពុងជិះឡាំប្រឺតាបានសម្រេច ហើយជនសង្ស័យម្នាក់បានចុះពីលើម៉ូតូដកកាំភ្លើងបាញ់គំរាមចំនួនពីរគ្រាប់ ភ្លាមៗនោះស្រាប់តែមានបុរសម្នាក់ជិះម៉ូតូមួយគ្រឿងបានបុកជនសង្ស័យបណ្ដាលឲ្យសន្លប់ត្រូវបានប្រជាពលរដ្ឋឃាត់បានប្រគល់ឲ្យសមត្ថកិច្ច ចំណែកឯបក្ខពួកម្នាក់ជិះម៉ូតូរត់គេចខ្លួនបាត់ស្រមោល។ ហេតុការណ៍នេះបានកើតឡើងកាលពីវេលាម៉ោង២ និង១០នាទី រំលងអាធ្រាត្រឈានចូលថ្ងៃទី១១ ខែសីហា ឆ្នាំ២០២៥ ស្ថិតនៅតាមបណ្ដោយផ្លូវជាតិលេខ២ ទល់មុខវត្ត រស្មីសោភណារាម ហៅវត្តសន្លូង ស្រុកកណ្តាលស្ទឹង ខេត្តកណ្តាល។
សមត្ថកិច្ចបានឲ្យដឹងថា ជនរងគ្រោះមិនបញ្ចេញអត្តសញ្ញាណនោះទេ គ្រាន់តែដឹងថា សំភារៈបាត់បង់ក្នុងការបូប មានទូរសព្ទ័ម៉ាកiphone 15 promix មួយគ្រឿង និងលុយ២០ម៉ឺនរៀលតែប៉ុណ្ណោះ ។
ចំណែកជនសង្ស័យ២នាក់ សមត្ថកិច្ចក៏មិទាន់ឱ្យស្គាល់អត្តសញ្ញាណដូចគ្នា គ្រាន់តែដឹងថា ដកហូតវត្ថុតាង មានដូចជាកាបូប១ ទូរស័ព្ទ១គ្រឿង ម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ស្វាយរៀង1T2523 គ្រាប់កាំភ្លើង៣គ្រាប់ និងកាំភ្លើងខ្លីមួយដើម មិនស្គាល់ម៉ាក ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ នារីជនរងគ្រោះ២នាក់ បានហៅឡាំប្រឺតាកង់បីជិះពីម្តុំ ទន្លេបាទី ខេត្តតាកែវ គោលបំណងទៅក្រុងតាខ្មៅ ខេត្តកណ្ដាល លុះជិះតាមបណ្ដោយផ្លូវជាតិលេខ២ ទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានបុរសជនសង្ស័យចំនួន៣នាក់ជិះម៉ូតូ២គ្រឿងក្នុងនោះម៉ាកហុងដាឌ្រីមមួយគ្រឿង និងហុងដាឃ្លីកមួយគ្រឿង បានជិះមកធ្វើសកម្មភាពឆក់យកកាបូបពីនារីម្នាក់ក្នុងចំណោម២នាក់បានសម្រេច តែកាបូបធ្លាក់លើផ្លូវ ហើយពេលនោះក្រុមជនសង្ស័យបានបើកម៉ូតូមករើសយកកាបូបវិញ និងបានដកកាំភ្លើងខ្លីបាញ់គំរាមចំនួន២គ្រាប់ ។
ប្រភពដដែលបានបន្តទៀតថា ជនសង្ស័យម្នាក់បានជិះម៉ូតូរត់គេចដោយយកកាបូបរបស់ជនរងគ្រោះទៅជាមួយបាត់ ហើយជនសង្ស័យ២នាក់ដែលជិះម៉ូតូហុងដាឌ្រីម ត្រូវបានបងប្អូនប្រជាពលរដ្ឋ អ្នកធ្វើដំណើរ ឃើញហេតុការណ៍ បើកម៉ូតូបំបុកបណ្តាលឲ្យដួលរងរបួស ហើយឃាត់បានបុរសទាំង២នាក់ប្រគល់ឲ្យសមត្ថកិច្ចតែម្ដង។ករណីនេះផងដែរ ជនសង្ស័យមិនបានសារភាពថាខ្លួនជាអ្នកប្រព្រឹត្តិនោះទេ ។
បន្ទាប់ពីកើតហេតុជនសង្ស័យរួមទាំងវត្ថុតាង និងជនរងគ្រោះត្រូវបានសមត្ថកិច្ចស្រុកកណ្ដាលស្ទឹង យកទៅសួរនាំដើម្បីបន្តតាមនីតិវិធី ៕
ដោយ៖ វិសាល
