ភ្នំពេញ៖ ទើបតែចប់ភារកិច្ចជូនជាតិនៅប្រទេសបារ៉ែនទទួលបានមេដាយប្រាក់ ឥឡូវនេះសៅយ៉ាន់ វិសាល ត្រូវត្រៀមភារកិច្ចថ្មីមួយទៀតចុងសប្តាហ៍នេះនៅលើសង្វៀនប្រដាល់របស់ស្ថានីយទូរទស្សន៍ថោន Mas Fight Cambodia ដណ្ដើមខ្សែក្រវ៉ាត់ IPCC ដោយប្រកួតតទល់ជាមួយកីឡាករធន់ បុរី ។

មិនត្រឹមតែជាការប្រកួតដណ្ដើមខ្សែក្រវ៉ាត់នោះទេ នេះគឺជាជំនួបសងសឹក រវាងកីឡាករទាំងពីរ ដោយកាលពីប្រកួតកន្លងទៅវិសាលបានបរាជ័យក្រោមថ្វីដៃរបស់បុរីរួចម្ដងមកហើយ ដូច្នេះលើកនេះគេប្រាកដជាមិនឲ្យភ្លាត់ដូចលើកមុនឡើយ។

តាមរយៈកិច្ចសម្ភាសន៍ជាមួយក្រុមការងារព័ត៌មានថោន កីឡាករវ័យក្មេងសៅយ៉ាន់ វិសាល ក៏បានដាក់ក្តីរំពឹងធ្វើការប្រកួតឲ្យអស់ពីសមត្ថភាពនៅចុងសប្តាហ៍នេះ ប៉ុន្តែមិនហ៊ាននិយាយពីភាគរយឡើយ ដោយសារកីឡាមានឈ្នះមានចាញ់មើលមិនឃើញ ក៏ប៉ុន្តែអ្វីដែលគេដឹងគឺគេនឹងប្រឹងប្រែងឲ្យអស់ពីលទ្ធភាពក្នុងការប្រកួតជាមួយដៃគូចាស់ ម្យ៉ាងទៀតនេះជាលើកទីមួយរបស់គេដែលបានឡើងមកប្រជែងខ្សែក្រវ៉ាត់ដល់វគ្គផ្ដាច់ព្រ័ត្របែបនេះ។

ចំណែកឯសម្ដីរបស់កីឡាករ ធន់ បុរីវិញ នេះគឺជាលើកទី 4 ហើយនៃការប្រកួតជម្រុះដណ្ដើមខ្សែក្រវ៉ាត់របស់គេ ហើយកាលពី3ប្រកួតលើកមុន គឺគេជោគជ័យបានតែមួយលើកប៉ុណ្ណោះ។សម្រាប់រូបគេផ្ទាល់ ការប្រកួតលើកទី 4 នេះគឺមានការលំបាកដោយសារតែបេក្ខភាពដែលចូលរួមសុទ្ធតែអ្នកល្អខ្លាំង ដូច្នេះការប្រកួតថ្ងៃចុងសប្តាហ៍នេះ គេនឹងប្រឹងប្រែងឱ្យអស់ពីសមត្ថភាព។

គួរជម្រាបផងដែរថា នៅចុងសប្តាហ៍នេះ សង្វៀនCambodia Mas Fight និងមានការប្រកួតជក់ចិត្តជាច្រើនគូ ជាពិសេសការប្រកួតដណ្ដើមខ្សែក្រវ៉ាត់វគ្គផ្ដាច់ព្រ័ត្រ ដូច្នេះកុំភ្លេចចូលរួមទស្សនាឲ្យបានច្រើនកុះករ។

*** គូប្រកួតសរុបនៅលើសង្វៀន Cambodia Mas Fight សប្ដាហ៍នេះរួមមាន៖

*គូមិត្តភាពជាតិគុនខ្មែរ (Kun Khmer Rules)៖

– ប្រុស ម៉ៅ Vs  ឡុង ផារៀង

– ដែន ជីវ័ន្ត Vs ទូច សាមីត

*គូមិត្តភាពអន្តរជាតិគុនខ្មែរ (Kun Khmer Rules)

– ហង្ស សំអាន  Vs កីឡាករចិន ZHANG SHICHENG

– ថៃ រ៉េត  Vs កីឡាករចិន LIU SHUAI

– សោម វិច្ឆ័យ   Vs កីឡាករអ៉ឺរ៉ងឮALI KAAB

– ផល សោភ័ណ្ឌ  Vs កីឡាករម៉ារុក ZOUHAIR ABOU ELFDAL។

ការប្រកួតនឹងប្រព្រឹត្តទៅនៅថ្ងៃទី១៦ ខែវិច្ឆិកា ឆ្នាំ២០២៥ ចាប់ពីម៉ោង៣រសៀលតទៅ ទីតាំងនៅស្ថានីយទូរទស្សន៍ថោន ដោយមានការផ្សាយផ្ទាល់នៅលើកញ្ចក់ទូរទស្សន៍ TOWN FULL HDTV ,នៅលើហ្វេសប៊ុកផេក TOWN FULL HDTV, TOWN FM 102.25 និង Cambodia Beer ផងដែរ៕

ដោយ៖ វិកគី