ភ្នំពេញ ៖ សាកសពបុរសចំនួនពីរនាក់បានផុសអណ្ដែតឡើងជាបន្តបន្ទាប់នៅតាមដងទន្លេសាប និងរសាត់តាមខ្យល់ហើយត្រូវបានប្រជានេសាទ និងសមត្ថកិច្ចនាំគ្នាអូសឡើងច្រាំងដើម្បីទាក់ទងហៅនគរបាលជំនាញចុះត្រួតពិនិត្យ។
ហេតុការណ៍ប្រទះឃើញសាកសពអណ្ដែតទឹកនេះបង្កឲ្យមានការភ្ញាក់ផ្អើលកាលពីវេលាថ្ងៃត្រង់ទី៣ ខែកក្កដា ឆ្នាំ ២០២៦ដែលសាកសពបុរសម្នាក់អណ្ដែតនៅខាងត្បូងស្ពានជ្រោយចង្វារ និងសាកសពបុរសម្នាក់ទៀតអណ្ដែតនៅក្បែរច្រាំងទន្លេ ក្បែរសណ្ឋាគារសុខា ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
តាមព័ត៌មានបានឲ្យដឹងថា នៅវេលាម៉ោងប្រមាណជា១១និង៣០នាទីថ្ងៃត្រង់ទី៣ ខែកក្កដា ឆ្នាំ២០២៦សាកសពបុរសម្នាក់បានផុសអណ្ដែតឡើងនៅខាងត្បូងស្ពានជ្រោយចង្វារហើយរសាត់តាមខ្សែទឹក។ ភ្លាមៗនោះអ្នកនេសាទក៏ប្រទះឃើញរួចក៏អូសយកឡើងច្រាំងទន្លេក្បែរសណ្ឋាគារសុខាដើម្បីឲ្យសមត្ថកិច្ចជំនាញត្រួតពិនិត្យ។ស្របពេលនោះដែរ ពេលដែលអូសទាញសពចូលខាងស្រាប់តែប្រទះឃើញសាកសពបុរសម្នាក់ទៀតអណ្ដែតទឹកនៅក្បែរច្រាំងទន្លេក្បែរសណ្ឋាគារសុខា។ បន្ទាប់ពីភ្ញាក់ផ្អើលសាកសពបុរសទាំងពីរនាក់ត្រូវបានសមត្ថកិច្ចអូសឡើងច្រាំងដើម្បីត្រួតពិនិត្យ ទោះបីជាយ៉ាងណាភ្លាមៗគេពុំទាន់ដឹងថា ស្លាប់ដោយសារមូលហេតុអ្វីពិតប្រាកដឡើយ។
ជាជំហានដំបូង គេសង្ស័យថា សពបុរសរូបនោះបានធ្វើអត្តឃាត ដោយលោតទឹកសម្លាប់ខ្លួនពីលើស្ពានណាមួយហើយសពបានអណ្ដែតឡើង។ ទោះបីជាយ៉ាងណាមានតែសមត្ថកិច្ចជំនាញចុះពិនិត្យទើបអាចកំណត់បានថា ជនរងគ្រោះស្លាប់ដោយសារអ្វីពិតប្រាកដ ៕
ដោយ៖ វិសាល
