ភ្នំពេញ ៖ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីជូនដំណឹងមួយដល់ម្ចាស់សំណង់ អ្នកអភិវឌ្ឍន៍អចលនវត្ថុ អ្នកអភិវឌ្ឍន៍លំនៅឋាន និងសាធារណជនទាំងអស់ឱ្យបានជ្រាបថា ដើម្បីធានាគុណភាព សន្តិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន ច្បាប់ស្តីពីសំណង់ដែលត្រូវបានប្រកាសឱ្យប្រើដោយព្រះរាជក្រមលេខ នស/រកម/១១១៩/ ០១៩ ចុះថ្ងៃទី២ ខែវិច្ឆិកា ឆ្នាំ២០១៩ បានតម្រូវឱ្យមានការត្រួតពិនិត្យ និងបញ្ជាក់សំណង់។
កាលពីថ្ងៃទី៣០ ខែធ្នូ ឆ្នាំ២០២០ រាជរដ្ឋាភិបាលបានចេញអនុក្រឹត្យលេខ២២៥ អនក្របក ដើម្បីកំណត់ លក្ខខណ្ឌ និងនីតិវិធីនៃការត្រួតពិនិត្យ និងបញ្ជាក់សំណង់។ ដើម្បីអនុវត្តអនុក្រឹត្យនេះ ក្រសួងរៀបចំដែនដី នគរូបនីយកម្ម និងសំណង់ បានចេញប្រកាសលេខ០៣៣ ដ. ន. ស./ ប. ក./ នី. ក. ចុះថ្ងៃទី២១ ខែមករា ឆ្នាំ ២០២១ ស្តីពីបែបបទនិងបរិបថនៃការផ្តល់អាជ្ញាបណ្ណ ការផ្តល់សន្លឹកអាជ្ញាបណ្ណថ្មី ការបញ្ចប់សុពលភាព និង ការបន្តសុពលភាពអាជ្ញាបណ្ណត្រួតពិនិត្យនិងបញ្ជាក់សំណង់ ប្រកាសលេខ១០៩ ដ. ន.ស/ ប្រ. ក. នី. ក. ចុះថ្ងៃទី ២២ ខែវិច្ឆិកា ឆ្នាំ២០២១ ស្តីពីបែបបទនៃការងារត្រួតពិនិត្យនិងបញ្ជាក់តម្រោងប្លង់ស្ថាបត្យកម្មនិងគម្រោងប្លង់ គ្រឿងផ្គុំសំណង់ និងប្រកាសលេខ១២៦ ៥. ន. ស./ ប.ក./ នី.ក. ចុះថ្ងៃទី៣០ ខែធ្នូ ឆ្នាំ២០២១ ស្តីពីបែបបទ ការងារត្រួតពិនិត្យនិងបញ្ជាក់ការងារសាងសង់និងរុះរើផ្នែកស្ថាបត្យកម្ម និងផ្នែកគ្រឿងផ្គុំសំណង់។
ក្រសួងរៀបចំដែនដី នគរូបនីយកម្ម និងសំណង់ សម្រេចដាក់ឱ្យអនុវត្តការត្រួតពិនិត្យនិងបញ្ជាក់សំណង់ ចាប់ពីថ្ងៃជូនដំណឹងនេះតទៅ។ ក្នុងស្មារតីនេះ ម្ចាស់សំណង់ អ្នកអភិវឌ្ឍន៍អចលនវត្ថុ និងអ្នកអភិវឌ្ឍន៍លំនៅឋាន ត្រូវរកអ្នកវិជ្ជាជីវៈ ឬក្រុមហ៊ុនត្រួតពិនិត្យនិងបញ្ជាក់សំណង់ ដែលមានអាជ្ញាបណ្ណផ្តល់ដោយក្រសួងរៀបចំដែនដី នគរូបនីយកម្ម និងសំណង់ ដើម្បីត្រួតពិនិត្យ និងចេញលិខិតបញ្ជាក់អនុលោមភាពនៃគម្រោងប្លង់ ការងារសាងសង់ ឬរះរើ ឬសំណង់របស់ខ្លួន តាមបទប្បញ្ញត្តិបច្ចេកទេសសំណង់ និងបទប្បញ្ញត្តិជាធរមានដទៃទៀត មុននឹងដាក់ ពាក្យស្នើសុំលិខិតអនុញ្ញាតសាងសង់ឬរុះរើ លិខិតអនុញ្ញាតជួសជុល លិខិតអនុញ្ញាតបើកការដ្ឋានសំណង់ និង វិញ្ញាបនបត្រប្រើប្រាស់សំណង់៕