ភ្នំពេញ៖ បុរសម្នាក់បានយកកាំបិតចុងស្រួចចូលទៅចាក់សម្លាប់ស្ត្រីម្នាក់ដល់ក្នុងផ្ទះដោយមិនដឹងមូលហេតុ បណ្តាលឱ្យស្លាប់ រួចអារ.កសម្លាប់ខ្លួនឯងតាមក្រោយតែមិនស្លាប់ ។ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង៣ និង៣០នាទីរសៀល ថ្ងៃទី១៨ ខែមេសាឆ្នាំ២០២៤ នៅបុរីពិភពថ្មី ឈូកវ៉ា២ ផ្លូវលេខ៣៦ ផ្ទះលេខ៣១ សង្កាត់សំរោងក្រោម ខណ្ឌពោធិ៍សែនជ័យ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឱ្យដឹងថា ជនរងគ្រោះឈ្មោះស្រីល័ក្ខ អាយុ៣៣ឆ្នាំ មានប្តីជាជនជាតិចិន និងមានកូនប្រុសតូចៗ២នាក់ ស្នាក់នៅបុរីពិភពថ្មី ឈូកវ៉ា២ ផ្លូវលេខ៣៦ ផ្ទះលេខ៣១ សង្កាត់សំរោងក្រោម ខណ្ឌពោធិ៍សែនជ័យ។
តាមប្រភពព័ត៌មានបានឲ្យដឹងទៀតថា មុនពេលកើតហេតុជនរងគ្រោះនៅក្នុងផ្ទះរបស់ខ្លួនដោយកូនប្រុសទាំង២នាក់នៅដេកក្នុងបន្ទប់ជាន់លើ ចំណែកប្តីចេញទៅធ្វើការបាត់។ លុះមកដល់វេលាកើតហេតុមិនដឹងជនដៃដល់មកពីណានោះទេ ពេលបានឃើញស្ត្រីរងគ្រោះក៏ចូលទៅប្រតាយប្រតប់ជាមួយស្ត្រីរងគ្រោះ។ ឃើញដូចនេះប្រជាពលរដ្ឋជិតខាងក៏រត់ទៅជួយតែទៅមិនទាន់ធ្វើឲ្យជនដៃដល់មានឱកាសចាក់ស្ត្រីរងគ្រោះជាច្រើនកាំបិតបណ្តាលឱ្យស្លាប់ក្នុងថ្លុកឈាម រួចជនដៃដល់បានអារ.កសម្លាប់ខ្លួនឯងតាមក្រោយតែមិនស្លាប់។
បន្ទាប់ពីកើតហេតុ ប្រជាពលរដ្ឋបានរាយការណ៍ទៅសមត្ថកិច្ចមូលដ្ឋានចុះមកដល់ចំណុចកើតហេតុ ហើយក៏បានហ៊ុមព័ទ្ធទីតាំងកើតហេតុ និងបញ្ជូនជនដៃដល់ទៅមន្ទីរពេទ្យដើម្បីសង្គ្រោះ។
បើតាមព័ត៌មានបឋមដែលទទួលបាន ជនដៃដល់ និងនរងគ្រោះជាបងប្អូនជីដូនមួយនឹងគ្នា តែមិនដឹងថាមានរឿងអ្វីនោះទេ ទើបកើតរឿងបែបនេះ។ តែទោះជាយ៉ាងណាសមត្ថកិច្ចមិនទាន់បញ្ជាក់ថា ករណីខាងលើជារឿងគំនុំឬយ៉ាងណានោះទេ ដោយសមត្ថកិច្ចកំពុងធ្វើការស្រាវជ្រាវ៕
ដោយ៖ វិសាល
