ភ្នំពេញ៖បុរសម្នាក់ជិះម៉ូតូលឿនមិនប្រយ័ត្នបានជ្រុលទៅបុកគល់ស្ពានអាកាសចោមចៅបណ្តាលឱ្យបោកក្បាលស្លាប់ភ្លាមៗនៅកន្លែងកើតហេតុ។ ហេតុការណ៍នេះបានកើតឡើងកាលពីម៉ោង៩ និង៣០នាទី យប់ ថ្ងៃទី២១ ខែមេសា ឆ្នាំ២០២៤ នៅចំណុចគល់ស្ពានអាកាសចោមចៅ ប៉ែកខាងត្បូង ផ្លូវជាតិលេខ៣ សង្កាត់ ចោមចៅទី២ ខណ្ឌពោធិ៍សែនជ័យ។ ជនរងគ្រោះ ជិះម៉ូតូម៉ាកហុងដាវ៉េវ ពណ៌ខ្មៅ ពាក់ស្លាកលេខភ្នំពេញ1GG 4568។
បើតាមប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញជនរងគ្រោះបើកម៉ូតូតាមបណ្តោយផ្លូវជាតិលេខ៣ក្នុងទិសដៅពីត្បូងទៅជើងក្នុងល្បឿនលឿន ខណៈមកដល់ចំណុចកើតហេតុស្រាប់តែរេចង្កូតទៅបុកគល់ស្ពានអាកាសចោមចៅពេញទំហឹងបណ្តាលឱ្យបោកក្បាលស្លាប់ភ្លាមៗនៅកន្លែងកើតហេតុ។
បន្ទាប់ពីកើតហេតុសមត្ថកិច្ចចុះមកដល់ ហើយក៏បានទំនាក់ទាក់ទំនងទៅក្រុមគ្រួសារមកទទួលសពយកទៅធ្វើបុណ្យតាមប្រពៃណី ចំណែកម៉ូតូត្រូវបានសមត្ថកិច្ចយកទៅរក្សាទុករងចាំសាច់ញាតិមកទទួលយកទៅវិញ៕
ដោយ៖វិសាល
