ខេត្តកំពង់ស្ពឺ ៖ កូនប្រសារវ័យចំណាស់ចិត្តស្លុយខ្លាំងណាស់បានទាញដាវកាប់ទៅលើឪពុកក្មេកបណ្តាលឱ្យរងរបួសដៃខាងឆ្វេងដេរចំនួន១៦ថ្នេរ ដោយសារតែទាស់ពាក្យសម្ដីជាមួយប្រពន្ធវ័តក្មេងបន្តិចបន្តួចបានបង្កឱ្យមានការភ្ញាក់ផ្អើលពេញភូមិ។ករណីហិង្សាកូនប្រសារវ័យចំណាស់ទាញដាវកាប់ឪពុកក្មេកនេះបានកើតឡើងកាលពីវេលាម៉ោង០២ និង៥៤នាទីរសៀលថ្ងៃទី៨ ខែមីនា ឆ្នាំ២០២៦ ស្ថិតនៅក្នុងភូមិត្រពាំងជ្រៃ ឃុំព្រៃវិហារ ស្រុកគងពិសី ខេត្តកំពង់ស្ពឺ ។
បើតាមនគរបាលស្រុកគងពិសីបានឱ្យដឹងថា ជនដៃដល់ជាកូនប្រសារត្រូវនគរបាលឃាត់ខ្លួននោះមានឈ្មោះ ប្រាក់ សុផាត អាយុ៦៤ឆ្នាំ ស្នាក់នៅនៅភូមិ-ឃុំ កើតហេតុខាងលើជាមួយប្រពន្ធ ។ ចំណែកឪពុកក្មេកមានឈ្មោះ ឡុង ប៊ុនលី ភេទប្រុស អាយុ៥៨ឆ្នាំ រស់នៅក្នុងភូមិកើតហេតុខាងលើ ។
សមត្ថកិច្ចស្រុកគងពិសីបានបន្តទៀតថា នៅមុនពេលកើតហេតុ ជនសង្ស័យដៃដល់ជាកូនប្រសារបានជិះរ៉ឺម៉កពីទិសខាងត្បូងមកទិសខាងជើង លុះពេលមកដល់មុខផ្ទះរបស់ ឈ្មោះ ឡុង ប៊ុនលី ដែលជាឪពុកក្មេក ក៏បានឈប់ ហើយស្រែកហៅប្រពន្ធឈ្មោះ លីម ស្រីកា អាយុ២៧ឆ្នាំ ដែលកំពុងនៅក្នុងផ្ទះនោះឱ្យយកទូរស័ព្ទមកឱ្យខ្លួន ពេលប្រពន្ធហុចទូរស័ព្ទឱ្យ ស្រាប់តែបុរសជាប្តីវ័យចំណាស់នោះបានបោកទូរស័ព្ទចោល រួចក៏បានដើរចូលក្នុងផ្ទះដោយមានកាន់ដាវថែមទៀតផង។
បន្ទាប់មក ក៏បានឈ្លោះប្រកែកគ្នា ជាមួយជនរងគ្រោះ ឡុង ប៊ុនលី (ជាឪពុកក្មេក ) ពេលនោះឈ្មោះឡុង ប៊ុនលី បានទាញចបជីក វាយលើជនសង្ស័យបណ្តាលឱ្យរងរបួសហើមដៃ ពេលនោះជនសង្ស័យជាកូនប្រសារវ័យចំណាស់បានទាញដាវដេញកាប់ជនរងគ្រោះដែលត្រូវជាឪពុកក្មេក ចំដៃខាងឆ្វេង បណ្តាលឱ្យដាច់សរសៃរងរបួសធ្ងន់ ដេរចំនួន១៦ថ្នេរ ។
ភ្លាមៗនោះ សាច់ញាតិក្រុមគ្រួសារបានបញ្ជូនយកទៅសង្គ្រោះព្យាបាលនៅមន្ទីរពេទ្យ។ រីឯជនដៃដល់បានឡើងជិះរ៉ឺម៉ករត់គេចខ្លួនទៅស្រុកកំណើតបាត់ នៅក្នុងភូមិព្រៃពាយ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
សមត្ថកិច្ចនគរបាលស្រុកគងពិសីបានបញ្ជាក់ថា ក្រោយទទួលព័ត៌មានរួចមក កម្លាំងជំនាញសហការជាមួយកម្លាំងប៉ុស្តិ៍នគរបាលរដ្ឋបាលព្រៃវិហារប៉ុស្តិ៍រដ្ឋបាលទួលអំពិស ស្រុកបសេដ្ឋ បានធ្វើការឃាត់ខ្លួនជនសង្ស័យបានភ្លាមៗ ។
បច្ចុប្បន្ន ជនសង្ស័យដៃដល់ត្រូវបានឃាត់ខ្លួននៅអធិការដ្ឋាននគរបាលស្រុកគង់ពិសី ដើម្បីកសាងសុំណុំរឿងចាត់ការបន្តតាមផ្លូវច្បាប់ ៕
ដោយ៖ សំណាង
