ភ្នំពេញ ៖ អគ្គិភ័យឆាបឆេះផ្ទះប្រជាពលរដ្ឋមួយខ្នងយ៉ាងសន្ធោសន្ធៅ បង្កការភ្ញាក់ផ្អើលដល់អ្នកជិតខាង និងអាជ្ញាធរមូលដ្ឋាន នាព្រឹកថ្ងៃទី៣១ ខែតុលា ឆ្នាំ២០២៣នេះ នៅចំណុចផ្លូវបេតុង ភូមិដំណាក់សង្កែ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។
សមត្ថកិច្ចបានឱ្យដឹងថា ម្ចាស់ទីតាំងមានឈ្មោះ ពេជ្រ ណាវី ភេទស្រី អាយុ៥០ឆ្នាំ ជនជាតិខ្មែរ មុខរបរ នៅផ្ទះ ។ ផ្ទះរងគ្រោះជាប្រភេទសំណង់ (ឈើលើថ្មក្រោម ទំហំ៥ម៉ែត្រX៨ម៉ែត្រ ) ដោយខូចខាតសម្ភារៈ ឆេះផ្ទះអស់ទាំងស្រុង និងពុំបានឆេះរាលដាលដល់ផ្ទះអ្នកក្បែរខាងឡើយ។
អគ្គិភ័យនេះមិនបណ្ដាលឱ្យមនុស្សស្លាប់ និងរបួសនោះទេ ហើយក្រុមមន្ត្រីជំនាញបានយករថយន្តការិយាល័យបង្ការ សង្គ្រោះអគ្គិភ័យចំនួន ០៣គ្រឿង បានប្រើប្រាស់ទឹកអស់ចំនួន ០៣ឡាន ស្មើរនឹង ១២ម៉ែត្រគូប។ ក្នុងនោះក៏មានរថយន្តជំនួយ ៖ រថយន្តរបស់ព្រលានយន្តហោះ ចំនួន០៥គ្រឿង ប្រើប្រាស់ទឹកអស់ចំនួន០១ឡាន សើ្មរនឹង ២០ម៉ែត្រគូប។ រថយន្តក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ចំនួន ០១ឡាន ស្មើនឹង ០៦ម៉ែត្រគូប ដោយពន្លត់ចប់នៅម៉ោង ៩និង៣០នាទីព្រឹកនាថ្ងៃខែ ឆ្នាំដដែល ។ សមត្ថកិច្ចជំនាញបានបញ្ចាក់ប្រាប់ថា ចំពោះមូលហេតុនៃការឆាបឆេះនេះបណ្ដាលមកពីឆ្លងចរន្តអគ្គិសនី ៕
ដោយ ៖ វិសាល
