ជនជាតិប៉ាឡេស្ទីនជាង 30 នាក់ត្រូវបានសម្លាប់ និងជាច្រើននាក់ផ្សេងទៀតកំពុងបាត់ខ្លួន បន្ទាប់ពីការវាយប្រហារតាមអាកាសរបស់កងទ័ពអ៊ីស្រាអែល ទៅលើផ្ទះប្រជាពលរដ្ឋនៅក្នុងទីក្រុង Jabalia ភាគខាងជើងតំបន់ Gaza កាលពីថ្ងៃអាទិត្យម្សិលម៉ិញនេះ ។
ទូរទស្សន៍ប៉ាឡេស្ទីនបានរាយការណ៍ថា ក្រុមការពារជនស៊ីវិលបានរកឃើញសាកសពជាង 30នាក់ ។ហើយមនុស្សប្រហែល ១០០ នាក់ត្រូវបានគេប៉ាន់ស្មានថា នៅតែជាប់នៅក្រោមគំនរបាក់បែកនៃអគារទាំងនោះ។
កងទ័ពអ៊ីស្រាអែលបានបើកការវាយប្រហារតាមផ្លូវអាកាស និងដីលើតំបន់ Gaza ជាការសងសឹកចំពោះការលុកលុយឆ្លងព្រំដែនដោយក្រុមហាម៉ាសប៉ាឡេស្ទីនកាលពីថ្ងៃទី 7 ខែតុលាកន្លងទៅនេះ។
ចាប់តាំងពីពេលនោះមក យ៉ាងហោចណាស់មានជនជាតិប៉ាឡេស្ទីនចំនួន 18 800នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ដែលភាគច្រើនជាស្ត្រី និងកុមារ និង 51,000 នាក់បានរងរបួស។ នេះបើយោងតាមអាជ្ញាធរសុខាភិបាលតំបន់ Gaza ។
យោងតាមតួលេខផ្លូវការបានឱ្យដឹងថា ចំនួនអ្នកស្លាប់របស់អ៊ីស្រាអែលនៅក្នុងការវាយប្រហាររបស់ក្រុមហាម៉ាសមានចំនួន 1,200 នាក់ ខណៈដែលចំណាប់ខ្មាំងជាង 130 នាក់នៅតែត្រូវបានចាប់ខ្លួន ដោយក្រុមប៉ាឡេស្ទីននៅក្នុងតំបន់ Gaza ៕
ប្រភព៖ A News
ប្រែសម្រួលដោយ៖ វាសនា