ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីជនជាតិចិនមួយក្រុមនាំគ្នារត់ចេញពីក្នុងសណ្ឋាគារយីហោ” ឌីសេន ផាលេស DECENT PALACE KTV” ហើយត្រូវបានក្រុមសន្តិសុខយាមកាមនៅទីតាំងនេះឃាត់ខ្លួនបានខ្លះ និងខ្លះទៀតបានរត់គេចខ្លួនបាត់ ក្រោយជនជាតិចិនមួយក្រុមនោះមានគ្នាច្រើននាក់ បាននាំគ្នាចូលផឹកស៊ី និងច្រៀងកម្សាន្តយ៉ាងសប្បាយ ដល់ពេលស្រវឹងជោគជាំបែរជាកើតជម្លោះ រួចក៏ចេញមកឈ្លោះប្រកែកគ្នានៅខាងក្រៅទៀត ភ្លាមៗនោះបុរសជនជាតិចិនម្នាក់ រត់ទៅយកកាំបិតមកដេញកាប់គ្នាឯង រត់ចែកជើងគ្នាតែម្តង។
យោងតាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើនេះ បានបញ្ជាក់ថា ករណីនេះ បានកើតឡើងនៅវេលាម៉ោងជិត២រំលងអាធ្រាតឈានចូលថ្ងៃទី១២ ខែមេសា ឆ្នាំ២០២៤នេះ ស្ថិតនៅចំណុចលើផ្លូវលេខ៦៣(វិថីត្រសក់ផ្អែម) សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
ប្រភពដដែលបានបន្តថា មុនពេលកើតហេតុ គេឃើញមានបុរសជនជាតិចិនមួយក្រុមមានគ្នាជាច្រើននាក់ បាននាំគ្នាចូលផឹកស៊ី និងច្រៀងកម្សាន្តសប្បាយ នៅក្នុងសណ្ឋាគារ ឌីសេន ផាលេស DECENT PALACE KTV ស្រាប់តែមួយសន្ទុះក្រោយមកពេលផឹកស្រវឹងរៀងៗខ្លួន បែរជាកើតជម្លោះគ្នា រួចក៏ចេញមកខាងក្រៅឈ្លោះប្រកែកគ្នាដោយស្រែកខ្លាំងៗ ភ្លាមៗនោះគេឃើញបុរសម្នាក់ បានរត់ទៅយកកាំបិត មកដេញកាប់គ្នាឯង រត់ចែកជើងគ្នាពេញមុខហាង បង្កការភ្ញាក់ផ្អើលយ៉ាងខ្លាំង។
ភ្លាមៗនោះក្រុមសន្តិសុខដែលយាមប្រចាំការនៅហាងខាងលើនេះ ប្រមាណជា៤នាក់ បាននាំគ្នាជួយឃាត់កុំឱ្យកើតមានហិង្សា និងឃាត់ក្រុមបុរសជនជាតិចិនទាំងនោះ មិនទាន់ឱ្យចេញពីកន្លែងកើតហេតុឡើយ ព្រោះពួកគេមិនទាន់គិតលុយថ្លៃផឹកស៊ីនៅក្នុងហាងនៅឡើយ។
ក្រោយកើតហេតុកម្លាំងសមត្ថកិច្ចមូលដ្ឋាន បានសហការជាមួយក្រុមសន្តិសុខយាមកាមនៅទីនោះ ក៏បាននិយាយសម្រួលគ្នាឱ្យក្រុមជនជាតិចិនទាំងនោះ គិតលុយថ្លៃផឹកស៊ីរួច ក៏ណែនាំឱ្យត្រលប់ទៅកន្លែងស្នាក់នៅវិញផងដែរ ព្រោះមិនមានបង្ករបួសស្នាមនោះទេ៕
ដោយ៖វិសាល